80-vjeçarit pales’tinez izrae’litët i vunë eksploziv në qafë, e shfrytëzuan si mburojë njerëzore!!?

Forcat izraelite i lidhën eksplozivët rreth qafës një palestinezi të moshuar në Gaza dhe e detyruan atë të vepronte si mburojë njerëzore përpara se ta vrisnin atë dhe gruan e tij, ka zbuluar një hetim nga uebsajti izraelit i lajmeve HaMakom, raporton middleeasteye.

Palestinezit, emri i të cilit nuk është bërë i ditur, por besohet se ishte mbi moshën 80-vjeçare, ushtarët i thanë se nëse nuk kryente kërkimet do të shpërthyenin eksplozivët  në kokë.

Sipas HaMakom, incidenti ndodhi në maj të vitit 2024 kur ushtarë izraelitë nga disa brigada të ndryshme u grumbulluan pranë shtëpisë së çiftit palestinez, të dy të moshës 80-vjeçare, në lagjen Zeitoun të qytetit të Gazës.

Në atë kohë, forcat izraelite kishin nisur sulmin e tyre të tretë tokësor në zonë pasi u përfshinë në luftime intensive me Hamasin dhe lëvizjet e tjera palestineze.

uebsajti HaMakom raportoi se Brigada Nahal, Brigada Carmeli dhe Njësia Shumëdimensionale, vendosën të përdorin të moshuarin palestinez, i cili përdorte një shkop për të lëvizur, si mburojë njerëzore.

Një ushtar izraelit i tha HaMakom se pasi palestinezit iu vendosën eksploziv në qafë, atij iu tha “se nëse ai bën diçka të gabuar ose jo siç duam ne, personi pas tij do të tërheqë litarin dhe koka e tij do të shkëputet nga trupi”.

“Kështu ai eci me ne për tetë orë, ndërsa ai ishte  80-vjeçar dhe nuk mund të ikte prej nesh. Dhe kjo është të dish se pas tij është një ushtar që mund ta tërheqë litarin në çdo sekondë”, rrëfeu ushtari izraelit.

Sipas HaMakom, pasi palestinezi i moshuar u detyrua të hynte në shtëpitë dhe tunelet që dyshohet se përdoreshin nga Hamasi, ushtarët e urdhëruan atë dhe gruan e tij të largoheshin nga zona për në al-Mawasi, një zonë e vogël që në atë kohë ishte vetëm 1 km e gjerë dhe po përdorej për të strehuar qindra mijëra palestinezë.

Megjithatë, HaMakom raportoi se asnjë batalion tjetër nuk ishte informuar se çifti do të bënte rrugën drejt jugut dhe brenda 100 metrave pasi u lejuan të largoheshin, të dy u qëlluan për vdekje nga ushtarët tjerë izraelitë. “Ata vdiqën ashtu, në rrugë”, tha një tjetër ushtar për HaMakom.

“Protokolli Mushkonja” i ushtrisë izraelite

Më shumë për “Protokollin Mushkonja” mund të lexoni duke klikuar këtu

Sipas HaMakom, vendimi për të përdorur të moshuarin si një mburojë njerëzore ishte pjesë e një taktike të gjatë të quajtur “protokolli i mushkonjave”, i cili lejon ushtarët izraelitë që urdhërojnë palestinezët të hyjnë në vende potencialisht të bllokuara – shtëpi, tunele dhe struktura të tjera – përpara trupave izraelite.

Ndërsa shtrirja dhe shkalla e operacioneve të tilla janë ende të panjohura, praktika, e cila është e paligjshme si në ligjin izraelit ashtu edhe në atë ndërkombëtar, është përdorur vazhdimisht në Gaza.

Në gusht, gazeta izraelite Haaretz raportoi se ushtria sioniste kishte përdorur vazhdimisht palestinezë të pafajshëm për të hyrë në shtëpi dhe tunele.

Në dhjetor 2023, Middle East Eye pranoi dëshmi të shumta nga palestinezët se forcat izraelite lidhnin eksplozivë mbi civilët përpara se t’i detyronin ata në zonat që besohet se përdoreshin nga Hamasi.

Më vonë, atë muaj, stafi mjekësor në Spitalin Shifa i tha portalit MEE se ushtarët izraelitë i përdorën ato si mburoja njerëzore kur inspektonin mjediset e spitalit.

“Kur sulmuan dyqanet në tokë, na përdorën ne [mjekët] si mburoja njerëzore për të hyrë dhe për t’i kontrolluar. Ata gjetën punonjësit e mirëmbajtjes teknike atje dhe i morën në pyetje, përpara se t’i ndalonin,” tha një mjek.

Ushtria izraelite, ashtu siç ka bërë në hetimet e mëparshme, ka mohuar përdorimin e palestinezëve si mburoja njerëzore, ndërsa hodhi poshtë raportet në lidhje me ekzistencën e “protokollit të mushkonjave”.

Por, një tjetër ushtar izraelit hodhi poshtë linjën zyrtare të ushtrisë, duke i thënë HaMakom se “protokolli i mushkonjave” është plotësisht i rregulluar dhe është një “zonë shumë gri” brenda ushtrisë.

“Është diçka nga niveli i komandantit të batalionit dhe më poshtë. Zbret si urdhër i rregulluar dhe diku në nivelin e komandantit të brigadës e mohojnë plotësisht. Kur fillojnë të bëjnë probleme, e kalojnë përgjegjësinë dhe thonë mos e bëni”, tha ushtari.

“Edhe kur të dalin hetimet, nuk ka asnjë shans që IDF [ushtria izraelite] të pranojë se ky është urdhri i rregulluar, por nëse shkoni te çdo luftëtar që lufton në Gaza, nuk ka njeri që t’ju thotë se nuk po ndodh”, ka deklaruar ky ushtar. /SHENJA/

MARKETING