Vriten 22 palestinezë në një seri sulmesh të reja ajrore në Gaza

Të paktën 22 palestinezë janë vrarë dhe disa të tjerë janë plagosur në një seri sulmesh të reja ajrore izraelite ndaj disa zonave në Rripin e Gazës, raporton Anadolu.

Sipas dëshmitarëve dhe burimeve mjekësore, shtatë persona u vranë dhe disa u plagosën kur avionët izraelitë goditën një shtëpi në lagjen Al-Daraj në lindje të qytetit Gaza.

Tetë palestinezë të tjerë u vranë dhe disa u plagosën, përfshirë shtatë oficerë të mbrojtjes ajrore, në dy sulme që goditën shkollën “Al-Falah” dhe lagjen Al-Zaytoun në pjesën juglindore të të njëjtit qytet. Shkolla po strehonte familje të zhvendosura.

Në lagjen Al-Rimal në perëndim, dy persona u vranë dhe disa u plagosën në një sulm ndaj një shtëpie. Ndërkohë, forcat izraelite u vunë zjarrin ndërtesave afër Universitetit Islamik në pjesën jugperëndimore të qytetit të Gazës, duke shkaktuar dëme të gjera.

Në Gazën qendrore, dy palestinezë u vranë dhe disa të tjerë u plagosën në sulmin izraelit ndaj kampit të refugjatëve Al-Nuseirat. Një person tjetër u vra dhe disa u plagosën në kampin Al-Bureij pasi sulmet izraelite shënjestruan një shtëpi.

Më 8 gusht, ushtria izraelite miratoi një plan, të propozuar nga kryeministri Benjamin Netanyahu, që gradualisht të pushtojë gjithë Rripin e Gazës duke filluar nga qyteti i Gazës, që është shtëpi e rreth 1 milion palestinezëve. Më pas, ushtria nisi ofensivë në shkallë të gjerë ndaj qytetit, duke shkatërruar shtëpi, kulla, prona dhe tenda të zhvendosurish, duke bombarduar spitale dhe duke kryer sulme tokësore.

Që nga tetori i vitit 2023, Izraeli ka vrarë në Rripin e Gazës më shumë se 66 mijë palestinezë, shumica prej tyre gra dhe fëmijë. Bombardimet e pandërprera e kanë kthyer enklavën në të pabanueshme dhe kanë çuar në uri.

Në vazhdim janë përpjekjet për një armëpushim dhe një marrëveshje më të gjerë të paqes për të rindërtuar Gazën, ndërkohë që këtë javë presidenti amerikan, Donald Trump, zbuloi një plan me 20 pika.

MARKETING