(VIDEO) Liderët botëror dënuan atentatin ndaj Trump
Udhëheqësit botërorë dënuan të shtënat me armë zjarri ndaj kandidatit të pritur republikan për president të Shteteve të Bashkuara, Donald Trump, një incident që tronditi fushatën zgjedhore në SHBA dhe rriti frikën për dhunë të mëtejshme politike.
Sekretari i përgjithshëm i Kombeve të Bashkuara Antonio Guterres dënoi atë që Byroja Federale e Hetimit e cilësoi si tentim-vrasje. “Sekretari i Përgjithshëm dënon këtë akt të dhunës politike. Ai i dërgon urimet e tij më të mira presidentit Trump për një shërim të shpejtë”, tha në një deklaratë zëdhënësi i Guterres, Stephan Dujarric.
Presidentja e Komisionit Evropian, Ursula von der Leyen, tha se ishte “thellësisht e tronditur” nga të shtënat.
URSULA VON DER LEYEN, PRESIDENT E KE-SË
“Dhuna politike nuk ka vend në një demokraci. I uroj Donald Trumpit shërim të shpejtë dhe i shpreh ngushëllimet e mia familjes së viktimës së pafajshme”.
Kryeministri kanadez, Justin Trudeau, tha se dhuna politike nuk është kurrë e pranueshme.
JUSTIN TRUDEAU, KRYEMINISTËR I KANADASË
“Mendimet e mia janë me ish-presidentin Trump, ata që ishin në vendngjarje dhe të gjithë amerikanët”.
Shefi i diplomacisë të Bashkimit Evropian, Josep Borrell, tha se ishte i tronditur, duke e dënuar ashpër sulmin.
“Edhe një herë ne jemi dëshmitarë të akteve të papranueshme të dhunës kundër përfaqësuesve politikë,” shkroi ai për X.
Presidenti turk Recep Tayyip Erdoğan e dënoi këtë akt në termat më të ashpra dhe theksoi se Turqia do të qëndrojë pranë popullit mik dhe aleat të ShBA-së.
REXHEP TAIP ERDOGAN, PRESIDENT I TURQISË
“Dënoj fuqishëm atentatin ndaj Donald Trump, presidenti i 45-të dhe kandidati presidencial i SHBA-së. Besoj se hetimi për sulmin do të kryhet në mënyrën më efikase për zgjedhjet amerikane dhe stabilitetin global”.
Ndërkaq, kryeministri hungarez, Viktor Orban, i cili ditë më parë e vizitoi Trumpin në shtëpinë e tij në Floridë tha se mendimet e tij dhe lutjet ishin me ish-presidentin e SHBA-së.
Presidenti i Ukrainës, i cili ka pasur një marrëdhënie të vështirë në të kaluarën me Trump, tha se ishte i tmerruar kur dëgjoi për të shtënat. “Dhunë e tillë nuk ka justifikim dhe nuk ka vend askund në botë”, shkroi ai në X.
Shërim të shpejtë Trumpit i uroi kryeministri izraelit, Benjamin Netanyahu.
Për atentatin ndaj Trumpit kanë reaguar edhe liderët e rajonit të Ballkanit Perëndimor.
Kryeministri i Kosovës, Albin Kurti ka dënuar tentim-vrasjen ndaj Trumpit, duke i uruar shërim të shpejtë dhe të plotë. “Mospajtimet politike në një demokraci gjithmonë duhet të shprehen përmes formave paqësore të fjalës dhe protestës dhe të zgjidhen nga zgjedhje të lira dhe fer”, shkroi ai në X.
Presidenti i Serbisë, Aleksandar Vuçiq, ka shprehur shqetësim për tentim-vrasjen, duke e dënuar “dhunën si mjet për përplasje politike”. “I uroj shërim të shpejtë, duke e ditur se ai do të dalë nga kjo luftë edhe më i fortë”, shkroi ai në X.
Sulmi ndaj Trumpit u dënua edhe nga udhëheqësit e tjerë të rajonit dhe botës.
Të shtënat në Pensivlani ndodhën dy ditë para nisjes së Kuvendit Kombëtar të Partisë Republikane, ku Trump pritet të sigurojë nominimin e partisë për të garuar në zgjedhjet presidenciale të 5 nëntorit.
/SHENJA/
MARKETING
