Vendi anëtar i NATO-s dhe mbështetësi më i madh i Ukrainës, së shpejti me udhëheqës pro-rus
Sllovakia po përgatitet të zgjedhë kryeministrin e saj të pestë në vetëm katër vjet dhe opozitari Robert Fico, njëherazi mbështetës i Kremlinit kryeson në sondazhe. Zhvillimet po shikohen me alarm në Perëndim.
Ish-kryeministri nuk e fsheh simpatinë ndaj remlinit dhe ka fajësuar “nazistët dhe fashistët ukrainas” për provokimin e presidentit rus Vladimir Putin për të nisur pushtimin, duke përsëritur narrativën e rreme që Putin ka përdorur për të justifikuar pushtimin e tij.
Grigorij Mesežnikov, një analist politik dhe president i Institutit të Çështjeve Publike, tha se si shumë simpatizantë të Rusisë, Fico e përfytyron mbështetjen e tij për Moskën si një nismë “paqe”.
“Ai dhe aleatët e tij argumentojnë se ne nuk duhet të dërgojmë armë në Ukrainë, sepse kjo do të bëjë që lufta të vazhdojë më gjatë. Ata thonë ‘do të ketë paqe nëse ndalojmë dërgimin e armëve në Ukrainë’ sepse nëse nuk e bëjmë konflikti do të përfundojë më shpejt. Pra, në thelb, ata nuk janë pro paqes, ata janë pro-rus”, tha ai për CNN.
Fico ka shërbyer më parë si kryeministër i Sllovakisë për më shumë se një dekadë, fillimisht midis 2006 dhe 2010 dhe më pas përsëri nga 2012 në 2018. Ai u detyrua të jepte dorëheqjen në mars 2018 pas javësh protestash masive për vrasjen e gazetarit investigativ Jan Kuciak dhe të fejuarës së tij, Martina Kušnírová. Kuciak raportoi për korrupsionin midis elitës së vendit, duke përfshirë njerëz të lidhur drejtpërdrejt me Fico dhe partinë e tij SMER.