UNICEF: Fëmijët në Gaza do të fillojnë të vdesin nga etja nëse nuk hiqet bllokada e karburantit

Zëdhënësi i Fondit të Kombeve të Bashkuara për Fëmijët (UNICEF), James Elder, paralajmëroi se fëmijët në Gaza do të fillojnë të vdesin nëse nuk hiqet bllokada aktuale e karburantit që zbatohet ndaj vendit, raporton Anadolu.

Elder bëri vlerësime mbi situatën në Gaza në konferencën javore për media të Zyrës së Kombeve të Bashkuara (OKB) në Gjenevë.

Ai theksoi se në Gaza, që është nën sulmet izraelite, po përjetohet periudha më vdekjeprurëse.

“Aktualisht, vetëm 40 për qind e impianteve të prodhimit të ujit të pijshëm në Gaza (87 nga 217) janë funksionale. Pa karburant, të gjitha këto do të ndalojnë së punuari brenda pak javësh. Fëmijët do të fillojnë të vdesin nga etja nëse nuk hiqet bllokada aktuale e karburantit që zbatohet në Gaza, e cila ka qenë në fuqi për më shumë se 100 ditë. Sëmundjet tashmë po përparojnë dhe kaosi po e shtrëngon kontrollin e tij”, tha Elder.

Elder tërhoqi vëmendjen se “kambanat e alarmit” po bien për situatën e ushqyerjes së pamjaftueshme në Gaza, duke shtuar se midis prillit dhe majit ka pasur një rritje prej 50 për qind të fëmijëve të shtruar për trajtim të kequshqyerjes.

“Gaza po përballet me një thatësirë të shkaktuar nga njeriu. Sistemet e ujit po rrënohen”, tha Elder, duke shtuar se këto probleme nuk janë logjistike apo teknike, por politike.

Më tej Elder theksoi se karburanti është gjithashtu jetik për spitalet në Gaza dhe se pa të do të ndalet prodhimi i oksigjenit dhe do të prishen pajisjet për mbështetjen e jetës.

MARKETING