Trump përshëndet propozimin e Putinit për bisedime të drejtpërdrejta me Ukrainën në Stamboll
Presidenti amerikan, Donald Trump, ka përshëndetur një propozim nga homologu i tij rus, Vladimir Putin, për të zhvilluar bisedime të drejtpërdrejta me Ukrainën në Stamboll, duke filluar nga e enjtja, transmeton Anadolu.
MARKETING
“Një ditë potencialisht e madhe për Rusinë dhe Ukrainën. Mendoni për qindra mijëra jetë që do të shpëtohen derisa kjo ‘gjakderdhje’ e pafund shpresojmë të marrë fund. Do të jetë një botë e gjitha e re dhe shumë më e mirë”, tha Trump në rrjetet sociale.
Më tej, Trump theksoi se do të vazhdojë të punojë me Moskën dhe Kievin për t’u “siguruar që kjo të ndodhë”.
“Një javë e madhe po vjen”, shtoi ai, duke aluduar për një zhvendosje të fokusit në rindërtim dhe tregti.
Në një konferencë për media mbrëmë në Moskë, Putin propozoi rifillimin e negociatave të drejtpërdrejta të paqes midis Moskës dhe Kievit në Stamboll duke filluar nga e enjtja.
Putin tha se ka planifikuar bisedime nesër me presidentin turk, Recep Tayyip Erdoğan, për t’i kërkuar atij të japë dritë jeshile për zhvillimin e negociatave në Stamboll..
Erdoğan, një kampion i hershëm i zgjidhjes së konfliktit, vazhdimisht ka ofruar që Turqia të jetë nikoqire e bisedimeve të paqes dhe të bëjë gjithçka që mundet për të promovuar një zgjidhje, pasi Turqia gëzon marrëdhënie të mira si me Rusinë ashtu edhe me Ukrainën.
Në përgjigje të propozimit, presidenti ukrainas, Volodymyr Zelenskyy, në rrjetet sociale tha se Kievi është gati të zhvillojë bisedime të drejtpërdrejta me Rusinë sapo Moska të konfirmojë një armëpushim “të plotë, të qëndrueshëm dhe të besueshëm” në vendin e tij duke filluar nga e hëna.
MARKETING
