Trump do të mbyllë 30 ambasada dhe konsullata amerikane

Administrata e Donald Trump do të mbyllë afro 30 ambasada dhe konsullata amerikane në mbarë botën, sipas një dokumenti të brendshëm të Departamentit të Shtetit të publikuar nga CNN.

Lista përfshin, ndër të tjera, ambasadat amerikane në Maltë, Luksemburg, Lesoto, Republikën e Kongos, Republikën e Afrikës Qendrore dhe Sudanin e Jugut.

Në të njëjtën kohë, propozohet mbyllja e pesë konsullatave në Francë, dy në Gjermani, dy në Bosnje dhe Hercegovinë, një në Mbretërinë e Bashkuar, një në Afrikën e Jugut dhe një në Korenë e Jugut.

Në dokument, sugjerohet gjithashtu reduktimi i pranisë në dy vende “kyç” për politikën amerikane kundër terrorizmit, Irakun dhe Somalinë, si dhe për “ripërcaktimin e madhësisë” të misioneve të tjera diplomatike.

Nuk dihet ende nëse Sekretari i Shtetit Marco Rubio i ka miratuar propozimet. Ndryshimet e ardhshme janë pjesë e një plani më të gjerë për të ridizajnuar në mënyrë drastike funksionimin e qeverisë amerikane, e cila mban vulën e të ashtuquajturit Departamenti i Efikasitetit të Qeverisë (DOGE), organi i krijuar nga Elon Musk, me qëllim thjeshtimin dhe kompresimin e qeverisë federale.

MARKETING