Trump dhe ushtria amerikane festojnë ditëlindjen, SHBA përgatitet për paradën më të madhe ushtarake në dekada

Ushtria amerikane do të mbajë një paradë të rrallë ushtarake në rrugët e Uashingtonit për të shënuar 250-vjetorin e themelimit të saj.

Në paradë do të marrë pjesë presidenti aktual i SHBA-së, Donald Trump, i cili mbush 79 vjeç në të njëjtën ditë dhe ka vite që pret një spektakël të tillë.

Bëhet e ditur se parada si kjo nuk janë të zakonshme në SHBA, megjithëse janë të zakonshme në vende si Franca dhe Rusia, përcjell Telegrafi.

Parada e fundit e ngjashme në Uashington u mbajt në vitin 1991 pas përfundimit të Luftës së Parë të Gjirit.

Tanke e automjete të blinduara u sollën nga baza ushtarake Fort Cavazos në Teksas, kryesisht me tren, dhe më pas u transportuan me kamionë në qendër të Uashingtonit.

Tanket e rënda Abrams, të cilat individualisht peshojnë rreth 63 ton, paraqitën një sfidë të veçantë logjistike sepse rrugët e qytetit mund të përballojnë deri në 36 ton ngarkesë.

Për shkak të kësaj, inxhinierët e ushtrisë kanë instaluar pllaka çeliku dhe veshje gome për të mbrojtur asfaltin në ditët e mëparshme.

Për shkak të madhësisë së eventit, pritet të marrin pjesë rreth 200,000 njerëz, dhe masat e sigurisë janë jashtëzakonisht të rrepta.

Janë instaluar 29 kilometra gardh metalik dhe 175 detektorë metali.

Eventi është klasifikuar si një Eveniment i Sigurisë Kombëtare me Rëndësi të Veçantë (NSSE), që do të thotë se Departamenti i Sigurisë Kombëtare i SHBA-së e konsideron atë si një rrezik potencial për sulme terroriste ose dhunë.

Ndryshe, kostoja e paradës mund të arrijë në 45 milionë dollarë, të cilën disa kritikë e kanë quajtur një shpërdorim të parave të taksapaguesve. /Telegrafi/

MARKETING