TikTok gjobitet me 530 milionë euro për transferimin e të dhënave të përdoruesve në Kinë

Platforma e ndarjes së videove TikTok është gjobitur me 530 milionë euro nga Komisioni Irlandez për Mbrojtjen e të Dhënave (DPC) për dështimin në mbrojtjen e të dhënave personale të përdoruesve të BE-së gjatë transferimit të tyre në Kinë.

Zëvendëskomisioneri i DPC Graham Doyle tha se transferimet shkelnin Rregulloren e Përgjithshme për Mbrojtjen e të Dhënave (GDPR) sepse TikTok dështoi të demonstronte se të dhënat personale të përdoruesve në BE, të aksesuara nga distanca nga stafi në Kinë, “u ishte ofruar një nivel mbrojtjeje në thelb ekuivalent me atë të garantuar brenda BE-së”.

Bëhet e ditur se TikTok – i cili ka rreth 159.1 milionë përdorues aktivë mujorë në Evropë – duhet të përmbushë përpunimin e të dhënave të tij brenda gjashtë muajve, shkruan euronews, përcjell Telegrafi.

Transferimet e të dhënave në Kinë do të pezullohen nëse nuk respektohet ky afat.

Ndryshe, DPC nisi hetimin në vitin 2021 si mbikëqyrësi kryesor i privatësisë në Evropë për kompaninë në pronësi të ByteDance të Kinës.

Gjatë hetimit, TikTok i tha DPC-së se nuk ruante të dhënat e përdoruesve të BE-së në serverët e vendosur në Kinë, por mbikëqyrësi gjeti prova që e kundërshtonin këtë.

Nuk është hera e parë që TikTok goditet me gjobë: ai mori një dënim prej 345 milionë euro në vitin 2023 pasi nuk mbrojti privatësinë e fëmijëve.

MARKETING