Të paktën 23 të vrarë dhe dhjetëra të plagosur në sulmet e fundit izraelite në Rripin e Gazës

Të paktën 23 persona janë vrarë dhe disa të tjerë janë plagosur në sulmet izraelite në Rripin e Gazës që nga mëngjesi i ditës së sotme, thanë burime mjekësore për Anadolu.

Artileria izraelite bombardoi civilët që prisnin shpërndarjen e ndihmave pranë zonës Zikim, në veri të Rripit të Gazës, duke vrarë nëntë persona dhe duke plagosur dhjetëra të tjerë.

Katër persona, përfshirë një grua, u vranë nga një sulm me dron izraelit në një tendë që strehonte palestinezë të zhvendosur në Qytetin e Gazës.

Sulmet izraelite vranë gjithashtu tre persona në Deir al-Balah dhe tre të tjerë në kampin e refugjatëve Nuseirat.

Veçmas, avionët izraelitë goditën shtëpi në kampin e refugjatëve Bureij, duke lënë dy persona të vdekur dhe duke plagosur të tjerë.

Dy persona humbën jetën gjithashtu pasi ushtria izraelite shënjestroi një tendë në perëndim të Khan Younisit, në pjesën jugore të Rripit të Gazës.

Izraeli ka vrarë më shumë se 59.200 palestinezë në Rripin e Gazës që nga tetori i vitit 2023, shumica prej tyre gra dhe fëmijë. Fushata ushtarake e ka shkatërruar enklavën, ka shembur sistemin shëndetësor dhe ka çuar në mungesa të mëdha ushqimore.

Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.

MARKETING