Sondazh: Qeveria e kancelarit gjerman Merz po e humb besimin e qytetarëve

Besimi te të gjitha figurat kryesore politike të qeverisë së koalicionit të kancelarit gjerman Friedrich Merz ka rënë këtë muaj, zbuloi një sondazh i ri të mërkurën, duke shënuar rënie të ndjeshme të mbështetjes pas shtatë muajsh në detyrë, transmeton Anadolu.

Sipas sondazhit të kryer nga instituti kërkimor “Forsa”, besimi tek udhëheqësi konservator Merz ra në 32 për qind në dhjetor, 6 për qind më poshtë nga 38 për qind kur qeveria e tij e koalicionit konservator, e majtë mori detyrën në maj 2025.

Zëvendëskancelari Lars Klingbeil i Social Demokratëve (SPD) gjithashtu pa vlerësimin e besimit të tij të binte nga 41 për qind në maj në 36 për qind në sondazhin e dhjetorit. Edhe ministri i Mbrojtjes, Boris Pistorius i konsideruar prej kohësh si politikani më popullor i Gjermanisë, shënoi rënie. Vlerësimi i besimit të tij ra me 5 për qind në 57 për qind krahasuar me majin 2025.

Qeveria e koalicionit është përballur me tensione të brendshme në rritje në muajt e fundit. Aleanca konservatore CDU/CSU e Merz dhe partneri i koalicionit SPD janë përplasur mbi politikën e migracionit, reformën e shërbimit ushtarak, reformat e pensioneve dhe prioritetet buxhetore – mosmarrëveshje që kanë ngritur pyetje midis votuesve lidhur me aftësinë e qeverisë për të qeverisur në mënyrë efektive.

Rënia e miratimit të koalicionit u reflektua edhe në sondazhet e mbështetjes së partive. Alternativa për Gjermaninë (AfD) e ekstremit të djathtë është rritur në 26 për qind në sondazhin e fundit të institutit “Forsa”, duke tejkaluar të gjitha partitë e tjera për t’u bërë forca politike më e fortë e Gjermanisë.

Konservatorët e Merzit (CDU/CSU), të cilët fituan zgjedhjet e parakohshme të shkurtit me 28.5 për qind, kanë rënë në 24 për qind, një për qind më poshtë nga java e kaluar. Social Demokratët ranë në 14 për qind, shumë më poshtë performancës së tyre zgjedhore prej 16.4 për qind. Të Gjelbrit regjistruan 12 për qind mbështetje ndërsa Partia Socialiste e Majtë mbetet në 11 për qind.

Koalicioni i kancelarit Merz përballet me një sfidë kritike politike në vitin 2026 me zgjedhjet parlamentare shtetërore të planifikuara në pesë shtete federale. Baden-Wyrtemberg dhe Rheinland-Pfalz votojnë në mars, të ndjekura nga Saksonia-Anhalt në qershor dhe Berlini dhe Mecklenburg-Vorpommern në shtator.

MARKETING