Rusia sulmoi me dronë dhe raketa objekte banimi në Ukrainë

Rusia gjatë natës kreu një sulm të madh me raketa dhe dronë ndaj qyteteve ukrainase, duke vrarë të paktën një person dhe duke plagosur 13 të tjerë.

Shpërthime janë dëgjuar në qytetet Pavlograd dhe Mikolajiv rreth orës 4:40 të mëngjesit, sipas orës lokale, raportuan zyrtarët lokalë.

Shpërthime të tjera janë dëgjuar më vonë në qytetin Dnipro, pak pas orës 6 të mëngjesit. Guvernatori i rajonit të Dnipropetrovskut, Serhij Lisak, njoftoi se një person ka humbur jetën dhe 13 të tjerë janë plagosur gjatë sulmit në këtë rajon. Në Dnipro, disa ndërtesa shumëkatëshe, shtëpi dhe garazhe janë dëmtuar. Zjarre janë raportuar gjithashtu në Pavlograd dhe Nikopol.

Në rajonin e Kievit, administrata ushtarake rajonale raportoi për sulme në komunitetet Buça, Borispil dhe Obuhiv. Gjatë sulmit janë dëmtuar një shtëpi, 10 njësi garazhesh dhe pesë automjete të parkuara.

Kryetari i qytetit Mikolajiv, Oleksandr Senkeviç, deklaroi se është shkaktuar dëm në një zonë banimi të qytetit, por deri tani nuk janë raportuar viktima.

Alarmet për sulm ajror janë aktivizuar në të gjitha rajonet e vendit rreth orës 5:45 të mëngjesit sipas kohës lokale dhe përfunduan rreth orës 7 të mëngjesit. Forcat ajrore ukrainase raportuan se dhjetëra dronë, si dhe raketa lundrimi dhe balistike, kanë fluturuar mbi territorin ukrainas gjatë sulmit.

Guvernatori i rajonit të Lvivit, Maksim Kozicki, njoftoi se dy raketa lundrimi janë rrëzuar mbi këtë rajon, pa viktima apo dëme. Gjatë sulmit, forcat ajrore polake ngritën avionë luftarakë për të mbrojtur hapësirën ajrore të Polonisë.

Sulmi ndodhi pak më shumë se një javë pasi dronët rusë shkelën hapësirën ajrore të Polonisë, duke detyruar forcat ajrore polake të rrëzojnë disa dronë mbi territorin e NATO-s, për herë të parë që nga fillimi i pushtimit rus të Ukrainës. /Telegrafi/

MARKETING