Rama ultimatum bizneseve në Vlorë: Keni 48-orë kohë të lironi Lungomaren

Kryeministri i Shqipërisë, Edi Rama ka reaguar sërish në lidhje me nismën e për lirimin e hapësirave publike të zëna në mënyrë të padrejtë nga biznese të ndryshme.

Rama në një postim në platformën X shkruan për Lungomaren në Vlorë, ku vendosi ultimatum bizneseve të bar-kafeneve të lirojnë hapësirat publike.

Shefi i qeverisë u la 48 orë kohë bizneseve që të lirojnë trotuaret dhe hapësirat publike për qytetarët.

Lexoni të plotë postimin:

Ky lloj zaptimi në Lungomaren e bukur të Vlorës, i përket një kategorie të re të quajtur “Pergolatë”, e cila i paraprin kërkesës për legalizim me teorinë skandaloze që toka ka pronar ndërtuesin e pallatit, ndërkohë që jo, toka rreth pallatit ka pronarë të gjithë banorët, njësoj si të gjitha mjediset e përbashkëta!

Halli me këto “pergolatat” vlonjate është se janë shtrirë edhe matanë zonës së paraparë nga projekti për vendosje çadrash e karrigesh për shërbimet dhe si në rastin e shenjuar në foto, janë hapur edhe anash pallateve duke rrëmbyer trotuaret, nën sytë e mbyllur të inspektorëve e të drejtuesve të bashkisë në vite!

Tani thirrja ime për të tërë zaptuesit e trotuareve në Lungomare është: Keni 48 orë

kohë për t’u kthyer qytetarëve dhe turistëve trotuaret e tyre dhe për t’i larguar të gjitha llojet e hekurishteve e të betonarmeve, duke i tërhequr njëkohësisht “pergolatat” në vijën e parashikuar nga projekti i Lungomares!

Nga e hëna nuk do keni më asgjë në dorë! ./Telegrafi/

MARKETING