Putini thërret “fushatën më të madhe të rekrutimit në vjeshtë që nga viti 2016”
Presidenti rus Vladimir Putin të hënën thirri 135,000 burra për shërbim ushtarak rutinë, fushata më e madhe e rekrutimit në vjeshtë në vend që nga viti 2016.
Sipas mediave të huaja, përcjell Telegrafi, rekrutët pritet të shërbejnë për një vit në një bazë ushtarake brenda Rusisë, jo për të luftuar në Ukrainë, megjithëse ka pasur raportime për burra të rekrutuar që janë dërguar në vijën e frontit.
Siç theksohet më tej, fushatat vjetore të rekrutimit në Rusi nuk kanë lidhje me mobilizimin, në të cilin burrat rusë rekrutohen për të luftuar gjatë kohës së luftës.
Rusia thërret burra të moshës midis 18 dhe 30 vjeç për shërbim ushtarak të detyrueshëm çdo pranverë dhe vjeshtë.
Por rekrutët që kanë përfunduar trajnimin ushtarak kanë më shumë gjasa të thirren për të luftuar në të ardhmen.
Në një dekret të lëshuar të hënën, Putin urdhëroi “rekrutimin e 135,000 qytetarëve të Federatës Ruse nga 1 tetori deri më 31 dhjetor 2025”.
Ky është rekrutimi më i madh i vjeshtës që nga viti 2016 dhe, i kombinuar me 160,000 ushtarët e thirrur në pranverë, do të thotë se viti 2025 pritet të jetë edhe rekrutimi më i madh total që nga ai vit.
Rusia zakonisht thërret më shumë burra në pranverë, kur shumica e njerëzve mbarojnë shkollën ose kolegjin.
Që nga nisja e sulmit të tij ushtarak në shkallë të plotë ndaj Ukrainës në shkurt 2022, Putin e ka vënë Rusinë në një situatë lufte, duke rritur shpenzimet ushtarake në nivele të papara që nga epoka sovjetike dhe duke zgjeruar madhësinë e ushtrisë.
Në këtë drejtim, Putin e ka rritur rekrutimin vjetor me një mesatare prej rreth pesë përqind çdo vit që nga viti 2022.
Në shtator 2024 ai urdhëroi zgjerimin e ushtrisë në 1.5 milion ushtarë aktivë – një nga më të mëdhenjtë në botë.
MARKETING
