Protesta në Tel Aviv kundër luftës dhe politikës së urisë së Izraelit në Gaza
Dhjetëra izraelitë u mblodhën në Sheshin Habima në Tel Aviv për të protestuar kundër politikës së urisë që qeveria izraelite po zbaton në Gaza, raporton Anadolu.
“Ndalo urinë” shkruhej në disa nga pankartat që mbanin protestuesit, të cilët kishin gjithashtu me vete fotografi të fëmijëve të vrarë në Gaza.
Izraeli ka vendosur një bllokadë mbi Gazën prej 18 vitesh, ndërsa që nga 2 marsi ka mbyllur të gjitha pikat kufitare, duke bllokuar hyrjen e ndihmave humanitare dhe duke përkeqësuar kushtet për 2.4 milionë banorët e enklavës palestineze.
Sipas Ministrisë së Shëndetësisë në Gaza, të paktën 147 persona, përfshirë 88 fëmijë, kanë vdekur nga uria që kur Izraeli nisi ofensivën e pamëshirshme në tetor të vitit 2023. Në total janë vrarë mbi 60.200 palestinezë, shumica gra dhe fëmijë.
Të hënën, organizatat izraelite për të drejtat e njeriut B’Tselem dhe Mjekët për të Drejtat e Njeriut–Izrael e akuzuan Izraelin për kryerje të gjenocidit në Gaza, duke cituar shkatërrimin sistematik të shoqërisë palestineze dhe shkatërrimin e qëllimshëm të sistemit shëndetësor në territor.
Në nëntor të vitit të kaluar, Gjykata Penale Ndërkombëtare lëshoi urdhërarreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën në enklavën palestineze.
MARKETING
