Presidenti iranian kritikon qëndrimin e BE-së, paralajmëron se “ndërhyrja” në luftë do të kishte “pasoja serioze”

Presidenti i Iranit, Masoud Pezeshkian, ka paralajmëruar se çdo “ndërhyrje” e jashtme në luftën në vazhdim do të kishte “pasoja serioze”, ndërsa kritikoi qëndrimin e Bashkimit Evropian ndaj sulmeve të Shtetet e Bashkuara dhe Izraeli kundër vendit të tij, transmeton Anadolu.

MARKETING

Në një bisedë telefonike me presidentin e Këshillit Evropian, Antonio Costa, Pezeshkian ka thënë se Irani “mbetet i përkushtuar për t’u mbrojtur” dhe ka fajësuar veprimet e Shteteve të Bashkuara dhe Izraelit për paqëndrueshmërinë rajonale, përfshirë tensionet në Ngushticën e Hormuzit.

Teherani ka mbajtur kontroll efektiv mbi Ngushticën e Hormuzit që nga fillimi i marsit, duke kufizuar qarkullimin e anijeve që transportojnë produkte energjetike.

Ai ka dënuar heshtjen e BE-së ndaj “krimeve” të SHBA-së dhe Izraelit si “të papërputhshme me pretendimet për të drejtat e njeriut”, duke u bërë thirrje vendeve evropiane “t’i përshtatin politikat e tyre me të drejtën ndërkombëtare”.

Costa, nga ana e tij, ka thënë se Evropa “nuk i mbështet sulmet ndaj Iranit”, duke shprehur shqetësim për ndikimin global të luftës. Ai ka bërë thirrje për ulje të tensioneve dhe rikthim te zgjidhjet diplomatike.

Shtetet e Bashkuara dhe Izraeli kanë vazhduar një ofensivë ajrore ndaj Iranit që nga 28 shkurti, duke vrarë deri më tani mbi 1.340 persona, përfshirë edhe udhëheqësin e atëhershëm suprem, Ali Khamenei.

Irani është kundërpërgjigjur me sulme me dronë dhe raketa që kanë shënjestruar Izraelin, si dhe Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë, si dhe duke tronditur tregjet globale dhe aviacionin.

MARKETING