Partia Alternativa për Gjermaninë e shpalli BE-në “projekt të dështuar”
Partia e ekstremit të djathtë Alternativa për Gjermaninë (AfD) e ka shpallur Bashkimin Evropian (BE) një “projekt të dështuar” në formën e tij aktuale, transmeton Anadolu.
Partia politike euroskeptike ka miratuar programin e saj për zgjedhjet e Parlamentit Evropian (PE) të qershorit të ardhshëm, në të cilin thotë se BE-ja ka “dështuar plotësisht” në të gjitha fushat e rëndësishme, përfshirë migracionin dhe politikën klimatike dhe ka refuzuar euron si monedhë.
Partia megjithatë hoqi dorë nga kërkesa për daljen e Gjermanisë nga BE-ja. Në vend të kësaj, AfD bën thirrje që BE-ja të rithemelohet si një “federatë e kombeve evropiane”, raporton DPA.
Sipas programit elektoral, detyrat kryesore të federatës së re duhet të jenë mbrojtja e kufijve të jashtëm kundër migracionit, autonomia strategjike në politikën e sigurisë dhe ruajtja e “identiteteve të ndryshme” në Evropë.
Sondazhet e fundit tregojnë se mbështetja e AfD-së është rritur nga 19 në 22 për qind. Programi i miratuar të dielën në Magdeburg është më i moderuar ndaj BE-së sesa projekt-programi i qershorit, në të cilin AfD tha se do të kërkonte “shpërbërje të rregullt të BE-së”.
Disa zyrtarë të AfD-së kanë shprehur më parë dëshirën që Gjermania të largohet tërësisht nga BE-ja. Megjithatë, programi i ri thotë se AfD mbështet idenë e një “bashkësie evropiane të shteteve sovrane, demokratike”.
Partia ka finalizuar gjithashtu listën e saj me 35 kandidatë për zgjedhjet e PE-së vitin e ardhshëm. Maximilian Krah, anëtar i PE-së që nga viti 2019, u zgjodh fundjavën e kaluar si kandidati kryesor i AfD-së me 65.7 për qind të votave.
Anëtarët kryesorë të AfD-së folën të dielën kundër bashkëpunimit me bllokun kryesor konservator të opozitës në vend, Unionin Kristian Demokrat (CDU) të ish-kancelares Angela Merkel.
Kreu i CDU-së, Friedrich Merz tha më parë se nuk do të kishte asnjë bashkëpunim as në nivel lokal midis Unionit të tij Kristian Demokrat dhe AfD-së, pasi sugjerimi i tij se ata mund të punonin së bashku tërhoqi kritika nga kolegët konservatorë.
MARKETING
