Një i vrarë dhe 8 të plagosur në sulmet ajrore izraelite në Libanin jugor pavarësisht armëpushimit

Një person është vrarë dhe tetë të tjerë janë plagosur në sulmet ajrore izraelite në Libanin jugor sot, në shkeljen e fundit të marrëveshjes së armëpushimit, tha Ministria e Shëndetësisë e vendit, transmeton Anadolu.

Në një deklaratë, Ministria tha se viktimat janë raportuar nga sulmet që kishin në shënjestër provincën Nabatieh.

Agjencia shtetërore e lajmeve NNA tha se dy valë sulmesh ajrore goditën pyllin Ali al-Taher dhe një ish-lokacion arkeologjik në Nabatieh.

Dronët dhe avionët luftarakë izraelitë të zbulimit fluturuan gjithashtu në lartësi mesatare në disa zona në Libanin jugor, tha transmetuesi.

Ushtria izraelite pretendoi se sulmet kishin në shënjestër një zonë të përdorur nga Hezbollahu për të menaxhuar sistemin e zjarrit dhe mbrojtjes, duke shtuar se zona ishte bërë e paoperueshme.

Nuk kishte asnjë koment nga Hezbollahu mbi pretendimin izraelit.

Kryeministri libanez Nawaf Salam, nga ana e tij, bëri thirrje për një ndërprerje të menjëhershme të shkeljeve izraelite të marrëveshjes së armëpushimit.

Në një deklaratë, Salam tha se qeveria libaneze nuk ka kursyer “asnjë përpjekje diplomatike për tërheqjen e Izraelit dhe ndalimin e shkeljeve të tij”.

Një armëpushim i brishtë ka qenë në fuqi në Liban që nga nëntori, duke i dhënë fund muajve të luftës ndërkufitare midis Izraelit dhe Hezbollahut, e cila u përshkallëzua në një konflikt të plotë në shtator.

Autoritetet libaneze kanë raportuar gati 3.000 shkelje të armëpushimit nga Izraeli, duke përfshirë vdekjen e gati 200 personave dhe plagosjen e rreth 500 të tjerëve.

Sipas marrëveshjes së armëpushimit, Izraeli duhej të tërhiqej plotësisht nga Libani jugor deri më 26 janar, por afati u zgjat deri më 18 shkurt pasi Izraeli refuzoi të zbatonte marrëveshjen.

Ai ende mban një prani ushtarake në pesë poste kufitare.

MARKETING