Një emigrant mysliman mund të bëhet kryetari i ardhshëm i Nju Jorkut

24 qershori shënon një moment të rëndësishëm për Partinë Demokratike në Nju Jork, pasi votuesit do të zgjedhin kandidatët për kryetar bashkie të qytetit më të madh në SHBA. Ish-guvernatori Andrew Cuomo mbetet favoriti i sondazheve, por një emër tjetër, Zohran Mamdani, po rritet me shpejtësi dhe po tërheq vëmendjen e të rinjve dhe progresistëve.

Në një garë që përfshin nëntë kandidatë, Cuomo ka një mbështetje të madhe prej 40% tek votuesit demokratë, por Mamdani ka bërë një paraqitje të fuqishme në fushatën e tij, duke shfrytëzuar popullaritetin në TikTok dhe duke u shfaqur si kandidati i “popullit”.

Mamdani është një imigrant nga Uganda dhe përfaqëson një grup progresist socialist, i cili është i lidhur ngushtë me Bernie Sanders dhe Alexandria Ocasio-Cortez.

Një moment i veçantë në fushatë erdhi kur Mamdani u shfaq si “anti-teza” e Cuomo-s dhe si një kandidat që nuk mbështet shtetin e Izraelit, duke e çuar fushatën e tij përtej shqetësimeve tradicionale. Me një donacion mesatar prej vetëm 80 dollarësh, Mamdani ka paraqitur veten si një kandidat pa financim të pasur, përkundër Cuomos, i cili mbështetet nga donatorë të pasur.
Ndërkohë, Cuomo përballet me një të kaluar të rëndë, pasi u detyrua të largohej nga posti i guvernatorit për shkak të akuzave për ngacmim seksual. Megjithatë, ai mbetet një emër i fuqishëm në politikën e Nju Jorkut dhe pritej që të fitonte me një shumicë të madhe, por rritja e Mamdani në sondazhe sugjeron mundësinë e një raundi të dytë votimi.

Kandidatët që do të dalin nga kjo garë brenda Partisë Demokratike do të përballen më Eric Adams, kryebashkiakun aktual të Nju Jorkut, i cili tani kandidon si i pavarur, dhe Curtis Silwan, nga Partia Republikane.

Ndërsa fushata po zhvillohet, është e qartë se Zohran Mamdani, me vetëm 33 vjet, mund të ketë një karrierë të shëndoshë politike përpara.

MARKETING