Mbi 70 shtete paralajmërojnë se sanksionet ndaj GJND-së paraqesin “rrezik të mosndëshkimit” për krimet e rënda
Më shumë se 70 vende, përfshirë Francën, Gjermaninë, Britaninë e Madhe dhe Holandën, riafirmuan mbështetjen e tyre për Gjykatën Ndërkombëtare Penale (GJND), e cila është sanksionuar nga SHBA për hetimin e krimeve të luftës izraelite në Rripin e Gazës, raporton Anadolu.
Në një deklaratë të përbashkët, shtetet pjesë e Statutit të Romës theksuan “mbështetjen e tyre të vazhdueshme dhe të palëkundur për pavarësinë, paanshmërinë dhe integritetin e GJND-së”.
Gjykata, thanë ata, “shërben si një shtyllë jetike e sistemit ndërkombëtar të drejtësisë duke siguruar llogaridhënie për krimet më të rënda ndërkombëtare dhe drejtësi për viktimat”.
“Masat që sanksionojnë Gjykatën, zyrtarët dhe stafin e saj dhe ata që bashkëpunojnë me të, janë miratuar në përgjigje të Gjykatës që kryen mandatin e saj në përputhje me Statutin e Romës”, thuhet në deklaratë.
Nënshkruesit paralajmëruan se masa të tilla “rrisin rrezikun e mosndëshkimit për krimet më të rënda dhe kërcënojnë të shkatërrojnë sundimin e ligjit ndërkombëtar, i cili është thelbësor për promovimin e rendit dhe sigurisë globale”.
Deklarata theksoi gjithashtu shqetësimet se “sanksionet mund të rrezikojnë konfidencialitetin e informacionit të ndjeshëm dhe sigurinë e atyre që janë përfshirë, duke përfshirë viktimat, dëshmitarët dhe zyrtarët e gjykatës, shumë prej të cilëve janë shtetas tanë”.
Vendet që mbështesin gjykatën me bazë në Hagë paralajmëruan gjithashtu se sanksionet mund të “minojnë rëndë të gjitha situatat aktualisht nën hetim pasi Gjykatës mund t’i duhet të mbyllë zyrat e saj në terren”.
Ata theksuan se avancimi i punës së GJND-së i shërben “interesit të përbashkët në promovimin e llogaridhënies”.
Duke e deklaruar veten “mbështetës të fortë të GJNP-së”, vendet shprehën keqardhje për “çdo përpjekje për të minuar pavarësinë, integritetin dhe paanshmërinë e Gjykatës”.
Ata u zotuan të sigurojnë “vazhdimësinë e punës së GJND-së në mënyrë që Gjykata të mund të vazhdojë të kryejë funksionet e saj në mënyrë efektive dhe të pavarur”.
“Teksa përpiqemi kolektivisht të mbështesim drejtësinë ndërkombëtare, ne nënvizojmë rolin e domosdoshëm të GJNP-së në dhënien fund të mosndëshkimit, promovimin e sundimit të ligjit dhe nxitjen e respektit afatgjatë për të drejtën ndërkombëtare dhe të drejtat e njeriut”, thuhet në deklaratë.
Presidenti amerikan Donald Trump nënshkroi sot një urdhër ekzekutiv që sanksionon GJNP-në për “veprime të paligjshme dhe të pabaza që synojnë Amerikën dhe aleatin tonë të ngushtë, Izraelin”.
Kryeministri izraelit Benjamin Netanyahu dhe ish-ministri i Mbrojtjes Yoav Gallant përballen me urdhërarreste të lëshuara nga GJND në nëntor të vitit të kaluar për krime lufte dhe krime kundër njerëzimit në Rripin e Gazës. Izraeli ka vrarë më shumë se 47.500 njerëz në Gaza që nga 7 tetori 2023 dhe e ka bërë atë të pabanueshme.
MARKETING
