Lideri i lartë i Hamasit vritet në një sulm ajror izraelit në jug të Gazës

Zyrtari i lartë i Hamasit dhe deputeti palestinez Salah al-Bardawil u vra në një sulm ajror izraelit në perëndim të Khan Younis në jug të Rripit të Gazës, njoftoi të dielën grupi palestinez.

Hamas deklaroi se Bardawil, anëtar i Byrosë së tij Politike dhe deputet në Këshillin Legjislativ Palestinez, u vra në një “sulm të shënjestruar ndërsa ishte duke falur namazin e natës në tendën e tij në zonën Al-Mawasi.”
Në sulm u vra gjithashtu gruaja e tij, shtoi grupi.

Sulmi ajror është pjesë e një bombardimi të vazhdueshëm izraelit mbi Gazën, i cili është intensifikuar ditët e fundit.

Hamas e dënoi sulmin duke e quajtur një “sulm të poshtër sionist”, duke akuzuar Izraelin se po “kryen krime lufte në kuadër të një fushate të organizuar masakrash” në Gaza.

Më shumë se 700 palestinezë janë vrarë dhe mbi 1,000 janë plagosur në një fushatë ajrore të papritur nga Izraeli mbi Gazën që nga e marta, duke shkatërruar një marrëveshje armëpushimi dhe shkëmbimi të burgosurish që ishte në fuqi që nga janari.

Që nga tetori 2023, gati 50.000 palestinezë, kryesisht gra dhe fëmijë, janë vrarë, ndërsa mbi 113.000 janë plagosur nga ofensiva brutale ushtarake izraelite në Gaza.

MARKETING