Kamboxhia akuzon forcat tajlandeze për intensifikimin e sulmeve
Kamboxhia akuzoi të premten forcat ushtarake tajlandeze për intensifikimin e sulmeve përgjatë zonave kufitare të diskutueshme, pavarësisht një raundi të parë bisedimesh që synonin uljen e tensioneve, sipas mediave shtetërore, transmeton Anadolu.
Duke folur në një konferencë për shtyp në kryeqytetin Phnom Penh, gjenerallejtënant Maly Socheata, zëdhënësja e Ministrisë së Mbrojtjes Kombëtare e Kamboxhias, tha se operacionet ushtarake tajlandeze filluan herët në mëngjes me bombardime të rënda artilerie që synonin disa vende të ndjeshme, duke përfshirë zonën e tempullit Preah Vihear në provincën Preah Vihear, si dhe zonat e tempullit Ta Krabey dhe Ta Mone në provincën Oddar Meanchey, raportoi Agence Kampuchea Presse.
Ajo tha se forcat tajlandeze kryen sulme intensive artilerie dhe operacione me avionë luftarakë, duke qëlluar dhjetëra predha në fshatin Chouk Chey.
Sulmet u pasuan nga granatime të mëtejshme dhe sulme bombardimi të udhëhequra nga dronë që synonin fshatrat Chouk Chey dhe Prey Chan.
Ndaj deklaratës së zëdhënëses së Ministrisë së Mbrojtjes nuk pati konfirmim ose reagim të menjëhershëm nga Tajlanda.
Megjithatë të enjten, ushtria tajlandeze tha se zbuloi katër mina tokësore pranë vendit ku një ushtar tajlandez u plagos pasi shkeli mbi një minë tokësore në provincën Surin.
Zhvillimet e fundit erdhën pasi Tajlanda dhe Kamboxhia zhvilluan bisedimet e tyre të para ushtarake të mërkurën në provincën Chanthaburi të Tajlandës mes luftimeve të reja, me numrin e përgjithshëm të të vdekurve nga të dyja palët që thuhet se arriti në 96, që kur përleshjet rifilluan më 8 dhjetor, një ditë pasi një përleshje kufitare plagosi dy ushtarë tajlandezë.
Zëdhënësja e Ministrisë së Mbrojtjes së Kamboxhias tha se pavarësisht sulmeve të raportuara, ekipet nga Komiteti i Përgjithshëm Kufitar Kamboxhia-Tajlandë ishin planifikuar të vazhdonin diskutimet të premten, duke shprehur shpresën se bisedimet teknike do të ndihmonin në sigurimin e një ndërprerjeje të armiqësive, rivendosjen e stabilitetit rajonal dhe lehtësimin e një kthimi në normalitet për civilët e zhvendosur.
Takimi i së mërkurës, i cili thuhet se zgjati më pak se një orë, shënoi angazhimin e parë midis zyrtarëve ushtarakë të të dy palëve që nga fillimi i përleshjeve të reja.
Autoritetet tajlandeze thanë se 23 ushtarë tajlandezë dhe një civil u vranë në luftime, duke shtuar se 41 civilë të tjerë vdiqën si “efekte anësore”. Ministria e Brendshme e Kamboxhias tha se 31 civilë kamboxhianë u vranë.
Gati një milion njerëz janë zhvendosur nga të dyja palët që nga fillimi i përleshjeve të reja.
MARKETING
