Izraeli vr’et 15 palestinezë, shkatërron uzinën për shkripëzimin e ujit në Gaza
Sulmet ajrore izraelite herët mëngjesin e sotëm në Gaza kanë vrarë të paktën 15 palestinezë dhe kanë plagosur disa të tjerë ndërkohë shënjestruan dhe shkatërruan uzinën për shkripëzimin e ujit.
Sipas burimeve mjekësore, 13 palestinezë u vranë në një sulm që vendosi në shënjestër një shtëpi familjare në lagjen Al-Manara në juglindje të qytetit Khan Younis të Rripit të Gazës.
Një palestinez dhe gruaja e tij po ashtu u vranë në një sulm ajror izraelit në Rafah të Rripit të Gazës.
Dëshmitarët okularë për Anadolu thanë se ushtria izraelite goditi uzinën për shkripëzimin e ujit Ghabayen në lagjen Al-Tuffah, në lindje të qytetit Gaza si pjesë e “luftës së saj për etje” kundër palestinezëve.
Sulmi ndaj uzinës vjen si pjesë e një katastrofe humanitare që është intensifikuar që nga 2 marsi kur Izraeli filloi të kufizojë hyrjen e furnizimeve thelbësore të ushqimit dhe ujit.
Mbyllja e pikave kufitare ka përkeqësuar mungesën e ushqimit dhe ujit në zonë.
Gazetari i Anadolut, duke cituar dëshmitarët okularë, tha se automjetet e ushtrisë izraelite përparuan në lindje të lagjes Shujaiya në pjesën lindore të qytetit Gaza, nën flakë të mëdha zjarri.
Ushtria izraelite ka njoftuar zgjerimin e ofensivës së saj në pjesën veriore të Gazës, duke filluar nga zona Shujaiya.
Të dielën, kryeministri izraelit, Benjamin Netanyahu tha se do të përshkallëzojë sulmet në Gaza derisa po bëhen përpjekje për të zbatuar planin e presidentit amerikan, Donald Trump, për të zhvendosur palestinezët nga enklava.
Që nga tetori i vitit 2023, të paktën 50.500 palestinezë janë vrarë në Gaza në sulmet e Izraelit, shumica prej tyre gra dhe fëmijë.
Nëntorin e vitit të kaluar, Gjykata Ndërkombëtare Penale (GJNP) lëshoi urdhërarreste ndaj kryeministrit izraelit, Benjamin Netanyahu dhe ish-ministrin të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë (GjND).
MARKETING
