Izraeli urdhëron evakuime masive në Khan Younis

Ushtria izraelite i urdhëroi të premten banorët në disa lagje të Khan Younisit, në jug të Gazës, që të evakuohen menjëherë përpara një “sulmi të afërt ushtarak”.

Avichay Adraee, një zëdhënës i ushtrisë izraelite, bëri thirrje që banorët e blloqeve 107 deri në 112, si dhe pjesës lindore të bllokut 88 në Khan Younis, të zhvendosen drejt perëndimit, në zonën tashmë tejmbushur të al-Mawasit.

Adraee paralajmëroi kundër kthimit në “zona të rrezikshme lufte” dhe tha se ushtria “do të veprojë me gjithë forcën në atë zonë”, duke pretenduar se të gjitha vendndodhjet nga ku hidhen raketa drejt Izraelit do të shënjestrohen.

Një hartë e bashkëngjitur me paralajmërimin tregonte zonat e evakuimit me ngjyrë të kuqe, duke treguar një zgjerim të ndjeshëm të asaj që Izraeli e quan “zona lufte”.

Rritja e këtyre zonave po e zvogëlon gjithnjë e më shumë hapësirën e disponueshme për civilët e zhvendosur.

Urdhrat për evakuim në Gaza shpesh pasohen brenda pak çastesh nga bombardime të rënda.

Në shumë raste, sipas banorëve palestinezë dhe organizatave humanitare, bombardimet nisin përpara se civilët të kenë mundësi të ikin.

Organizatat e të drejtave të njeriut dhe agjencitë e OKB-së kanë dënuar vazhdimisht sulmet e përsëritura të Izraelit ndaj zonave të strehimit, përfshirë tendat dhe zonat e shpallura si “të sigurta”.

Që nga 18 marsi, përmasat e paralajmërimeve për evakuim dhe zonave të shpallura si të luftës janë zgjeruar ndjeshëm, duke mbuluar rreth 85% të Gazës, sipas vlerësimeve të OKB-së.

MARKETING