Irani: Vetëm një nga 3 objektet bërthamore u shkatërrua nga sulmet amerikane në qershor

Sulmet ajrore të urdhëruara nga Presidenti i SHBA-së Donald Trump kundër objekteve bërthamore në Iran qershorin e kaluar shkatërruan vetëm një nga tre vendet e goditura, sipas një raporti ekskluziv nga NBC News të publikuar të enjten.

Duke cituar zyrtarë aktualë dhe ish-zyrtarë amerikanë të njohur me çështjen, NBC News raporton se një vlerësim i kohëve të fundit që iu dorëzua Donald Trump zbulon se sulmet amerikane kundër tre objekteve kryesore bërthamore në Iran në fund të fundit shkatërruan vetëm një prej tyre.

Sulmet u kryen natën e 21 qershorit 2025 dhe synonin goditjen e thelbit të programit të pasurimit të uraniumit të Iranit. Këto sulme erdhën disa ditë pas fillimit të sulmeve ajrore izraelite në Iran, duke synuar objektet ushtarake dhe bërthamore, si dhe personelin e lartë të Gardës Revolucionare.

SHBA-të shënjestruan tre objekte kryesore bërthamore në Fordow, Natanz dhe Isfahan, duke përdorur bombardues B-2 Spirit, të mbështetur nga fluturime dronësh për të mashtruar mbrojtjen ajrore iraniane.

Sulmet u kryen me bomba të drejtuara GBU-57 “Massive Ordnance Penetrator”, të projektuara për të depërtuar në objekte nëntokësore me mbrojtje të lartë. Megjithatë, sipas një vlerësimi të dorëzuar së fundmi në Shtëpinë e Bardhë, vetëm një objekt u shkatërrua plotësisht.

Sipas NBC News, ky raport e shtyu Trumpin të refuzonte një plan të gjerë ushtarak që parashikonte sulme të njëpasnjëshme gjatë një periudhe disa javore, me qëllim neutralizimin e plotë të infrastrukturës bërthamore të Iranit.

Ky publikim vjen pas pretendimeve të Donald Trump, i cili kishte deklaruar se Operacioni “Midnight Hammer” shkatërroi plotësisht objektet bërthamore iraniane, duke i përshkruar si “të rreme” të gjitha raportet që kundërshtojnë pretendimet e tij.

MARKETING