Irani i “gatshëm t’i japë fund sulmeve nëse Izraeli ndalon sulmet

Ministri iranian i Punëve të Jashtme, Abbas Araghchi, ka deklaruar se Irani është gati të ndalojë sulmet ndaj Izrelit nëse Tel Avivi i jep fund sulmit ndaj Tel Avivit, transmeton Anadolu.

Duke folur para ambasadorëve të huaj në Teheran, Araghchi theksoi se lufta iu “imponua” Teheranit dhe se Iranit nuk i mbeti zgjidhje tjetër veçse të përgjigjej.

“Mbrojtja jonë është plotësisht legjitime dhe do të kryhet fuqishëm, vetëm në përgjigje të agresionit. Nëse sulmet ndalen, veprimet hakmarrëse gjithashtu do të marrin fund”, tha shefi i diplomacisë iraniane.

Tensionet janë përshkallëzuar ndjeshëm midis Iranit dhe Izraelit pas sulmeve ajrore të koordinuara izraelite në lokacione të shumta në të gjithë Teheranin herët të premten, duke përfshirë objektet ushtarake dhe bërthamore, duke bërë që Irani të nisë sulme hakmarrëse brenda disa orësh.

Mbrëmë, Irani nisi një valë të dytë të operacionit të tij të quajtur “Premtimi i Vërtetë III”, duke shënjestruar kryesisht objektet ekonomike dhe industriale në qytetin port izraelit Haifa. Paralelisht, sulmet izraelite goditën Ministrinë e Mbrojtjes dhe depot e naftës në Teheran.

Irani tha se 78 persona u vranë në ditën e parë të sulmeve izraelite dhe dhjetëra, përfshirë fëmijë, u vranë në ditën e dytë.

Shpërthimi i armiqësive çoi në pezullimin e negociatave indirekte bërthamore midis Iranit dhe SHBA-së, të cilat ishin ndërmjetësuar nga Omani. Raundi i gjashtë i bisedimeve ishte planifikuar për sot në Muscat, por u anuluan.

Bashkëpunimi i SHBA-së

Më tej, shefi i diplomacisë iraniane tha se “agresioni” izraelit nuk mund të kishte ndodhur pa koordinim dhe mbështetje nga SHBA-ja, duke e përmendur këtë si një arsye kryesore për ndërprerjen e bisedimeve.

Ai tha se Irani ka “prova të forta dhe bindëse” se forcat amerikane dhe bazat ushtarake në rajon kanë mbështetur sulmet izraelite.

Araghchi përmendi deklaratat e bëra nga presidenti i SHBA-së, Donald Trump, i cili tha se sulmet “nuk mund të kishin ndodhur pa pajisjet amerikane” dhe aludoi për “faza të mëtejshme që do të vijnë”, si prova të mëtejshme të bashkëpunimit të SHBA-së.

Lidhur me mohimin e përfshirjes së SHBA-së në sulmet izraelite ndaj objektit bërthamor Natanz të Iranit në provincën Isfahan, Araghchi tha se Irani nuk e pranon pretendimin për shkak të “provave kontradiktore”.

“Nëse SHBA-ja vërtet nuk ka pasur rol, duhet ta dënojë qartë dhe publikisht sulmin”, tha Araghchi, duke theksuar se mesazhet private janë të pamjaftueshme. Ai gjithashtu i bëri thirrje komunitetit ndërkombëtar të njohë “shkeljet e ligjit ndërkombëtar” nga Izraeli.

Araghchi akuzoi Izraelin për “sabotim të përsëritur të negociatave bërthamore”, duke përmendur sabotimin e vitit 2020 të Natanzit gjatë bisedimeve të Vjenës që synonin ringjalljen e marrëveshjes bërthamore të vitit 2015. Ai tha se Irani iu përgjigj këtij incidenti duke rritur pasurimin e uraniumit në 60 për qind dhe duke zëvendësuar centrifugat e dëmtuara me modele më të përparuara.

Ministri i jashtëm iranian tha se pavarësisht provokimeve Irani ka hyrë në bisedime me SHBA-në me mirëbesim, duke mbajtur pesë raunde dhe duke përgatitur një kundërpropozim që synonte të mbushë boshllëqet për një marrëveshje të mundshme.

Megjithatë, ai përsëriti se Izraeli mbetet kundër çdo marrëveshjeje bërthamore dhe po punon në mënyrë aktive për të prishur diplomacinë.

Araghchi tha se Irani i ka kërkuar zyrtarisht Agjencisë Ndërkombëtare të Energjisë Atomike (IAEA) të thërrasë një seancë të jashtëzakonshme për të trajtuar sulmin e fundit izraelit në Natanz, duke e përshkruar atë si një “vijë të kuqe” në të drejtën ndërkombëtare që Izraeli tani e ka kaluar.

MARKETING