INTERPOL-i me urdhërarrest për terroristët e sulmit në Banjskë

Ministri i Brendshëm, Xhelal Sveçla, ka njoftuar se selia qendrore e INTERPOL-it ka shpallur në kërkim ndërkombëtar të gjithë terroristët e sulmit të 24 shtatorit në Banjskë të Zveçanit, raporton Gazeta Sinjali.

Përmes një postimi në rrjetin social Facebook, Sveçla ka thënë se ky është një hap i rëndësishëm dhe si i tillë ka efektin e plotë atëherë kur Serbia i dorëzon këta terroristë tek autoritetet kosovare.

“Mirëpres njoftimin zyrtar nga selia qendrore e INTERPOL se tashmë janë insertuar në sistemin e urdhër arrestit ndërkombëtar të gjithë personat e dyshuar që realizuan sulmin terrorist të 24 shtatorit në Banjskë të Zveçanit. Ky është një hap i rëndësishëm dhe si i tillë ka efektin e plotë atëherë kur Serbia e cila është duke strehuar dhe akomoduar këta terroristë, i dorëzon tek autoritetet tona për t’u përgjigjur para drejtësisë“, shkroi ai.

Më tej Sveçla është shprehur se ndëshkimi për udhërdhënësit, organizatorët dhe ekzekutuesit e këtij sulmi duhet të ndodh sa më parë, si garancë e mospërsëritjes së akteve të ngjashme terroriste.

“Llogaridhënia për organizimin dhe realizimin e sulmit terrorist të 24 shtatorit ku mbeti i vrarë Rreshter Afrim Bunjaku është e domosdoshme. Ndëshkimi për urdhërdhënësit, organizatorët dhe ekzekutuesit e këtij sulmi duhet të ndodhë sa më parë, si garancë e mos përsëritjes së akteve të ngjajshme terroriste”, tha Sveçla.

Kujtojmë se më 24 shtator, si pasojë e një konfrontimi me armë me një grup terrorist serb në Banjskë të Zveçanit, ka humbur jetën rreshteri i Policisë së Kosovës, Afrim Bunjaku dhe ka mbetur i plagosur zyrtari policor, Alban Rashiti.

Të vrarë kanë mbetur edhe tre nga terroristët serb që morën pjesë në agresionin e dhunshëm, teksa disa të tjerë u arrestuan, por shumica prej mbi 80 sosh ikën nga vendi i ngjarjes.

Kosova ka fajësuar Serbinë se organizoi sulmin terrorist, gjë që u mohua nga Beogradi zyrtar, të cilët thanë se kjo ishte revoltë e serbëve lokalë.

Përgjegjësinë për sulmin e mori ish-nënkryetari i Listës Serbe, i sanksionuari nga Shtetet e Bashkuara të Amerikës dhe Britania e Madhe, Milan Radoiçiq, i cili mohoi se ka marrë ndonjë ndihmë nga Beogradi.

MARKETING