I dërguari iranian refuzon termin “armëpushim”, thotë se sulmet janë ndalur reciprokisht
Ambasadori iranian në Turqi, Mohammad Hassan Habibollahzadeh, ka deklaruar se vendi i tij nuk e pranon termin “armëpushim” në lidhje me ndalimin e fundit të armiqësive me Izraelin, duke pohuar se Irani ndaloi përgjigjen vetëm pasi pala kundërshtare ndaloi sulmet, raporton Anadolu.
MARKETING
Habibollahzadeh u tha gazetarëve në kryeqytetin turk Ankara se de-përshkallëzimi i fundit erdhi me kërkesë të palës tjetër.
“Një armëpushim u arrit me kërkesë të palës tjetër. Por më lejoni të jem i qartë, ne nuk e pranojmë termin ‘armëpushim’. Që nga fillimi, ne thamë se nëse pala tjetër ndalon sulmet e saj, ne do të përgjigjemi në të njëjtën mënyrë”, tha Habibollahzadeh.
Ai akuzoi Izraelin se kërkoi mbështetje ushtarake amerikane për shkak të “dobësisë dhe llogaritjeve të gabuara” të tij dhe tha se SHBA-ja u përgjigj duke u bashkuar me konfliktin dhe duke shënjestruar objektet bërthamore iraniane.
Ambasadori iranian gjithashtu tha se përleshjet, të shkaktuara nga sulmet izraelite në territorin iranian, zgjatën pothuajse 12 ditë dhe çuan në vdekjen e komandantëve, civilëve dhe shkencëtarëve iranianë. Ai i përshkroi sulmet si shkelje të ligjit ndërkombëtar.
Ai paralajmëroi se çdo agresion i ardhshëm do të përballet me hakmarrje.
Habibollahzadeh theksoi se programi bërthamor i Iranit mbetet nën mbikëqyrjen e Agjencisë Ndërkombëtare të Energjisë Atomike (IAEA), e cila sipas tij, nuk ka gjetur prova të aktivitetit të armëve bërthamore.
Zyrtari iranian gjithashtu tha se Iranit nuk i lejohej të kryente aktivitete bërthamore paqësore.
“Ata duan që njohuritë bërthamore të mbeten nën kontrollin e tyre. Ata nuk duan asnjë vend, veçanërisht vendet muslimane, të kenë qasje në këto njohuri. Të gjitha këto veprime të paligjshme rrjedhin nga kjo”, tha ai.
Ai pranoi se objektet bërthamore të Iranit pësuan dëme të konsiderueshme gjatë sulmeve, megjithëse rrjedhje bërthamore nuk ndodhi. Ai paralajmëroi se rezultati mund të kishte qenë katastrofik për rajonin.
Habibollahzadeh gjithashtu tha se Irani ka nisur iniciativa në OKB në përgjigje të asaj që ai e quajti shkelje të normave ndërkombëtare që mbrojnë infrastrukturën bërthamore.
– Mbështetja e Turqisë
Më tej, ambasadori iranian falënderoi Turqinë për solidaritetin e saj gjatë konfliktit.
“Falënderojmë të gjithë vëllezërit dhe motrat tona në Turqi që na kanë mbështetur në mënyra të ndryshme gjatë kësaj lufte të padrejtë dhe brutale”, tha ai, duke shtuar se kjo tregon “sa afër” janë dy kombet”.
Ai theksoi se derisa Tel Avivi mori mbështetje nga disa vende, Irani luftoi i vetëm.
Habibollahzadeh gjithashtu theksoi se një vendim përfundimtar në lidhje me ngushticën strategjike të Hormuzit është nën autoritetin e udhëheqjes së lartë ushtarake dhe shtetërore dhe ende nuk është marrë.
Konflikti 12-ditor midis Izraelit dhe Iranit shpërtheu më 13 qershor pasi Izraeli nisi sulme ajrore në lokacionet ushtarake, bërthamore dhe civile iraniane, sipas autoriteteve iraniane, duke vrarë të paktën 606 persona dhe duke plagosur rreth 5.332 të tjerë.
Teherani nisi sulme hakmarrëse me raketa dhe dronë ndaj Izraelit, sipas shifrave të publikuara nga Universiteti Hebraik i Kudsit, duke vrarë të paktën 20 persona dhe duke plagosur mbi 3.400 të tjerë.
Konflikti u ndal sipas një armëpushimi të ndërmjetësuar nga SHBA-ja që hyri në fuqi më 24 qershor.
MARKETING
