I dënuari i parë për gjenocidin në Srebrenicë transferohet në një burg në Estoni
Radislav Krstiq, ish-komandant i Korpusit Drina të Ushtrisë së Republikës Serbe, i cili u dënua me 35 vjet burgim për gjenocidin në Srebrenicë, do të vazhdojë vuajtjen e dënimit të tij në Estoni, siç njoftoi Mekanizmi Ndërkombëtar për Tribunalet Penale më 10 prill.
Krstiq ishte shpallur fajtor nga Tribunali i Hagës për gjenocidin ndaj më shumë se 8000 boshnjakëve në Srebrenicë, për përndjekje si krim kundër njerëzimit dhe për vrasje.
Ai u arrestua më 2 dhjetor 1998 dhe u dërgua në Hagë për paraburgim. Në prill të vitit 2004, ai u dënua me burg, dhe më pas u transferua në Mbretërinë e Bashkuar për të vuajtur dënimin. Në vitin 2013, pas një sulmi nga të burgosurit e tjerë, ai u dërgua në Poloni, ku qëndroi deri në nëntor 2023, kur u kthye në Hagë për shkak të ligjeve polake që parashikonin lirimin e tij pasi kishte vuajtur dy të tretat e dënimit.
Më pas, Qeveria estoneze njoftoi se ishte e gatshme të pranonte Krstiqin për të vazhduar vuajtjen e dënimit të tij, që pritet të përfundojë më 23 nëntor 2033, sipas një deklarate nga kryetarja e gjykatës, Graciela Gatti Santana, shkruan klix.ba.
Krstiq është i pari që është dënuar për gjenocidin në Srebrenicë, i cili ndodhi në korrik 1995. Ai ka kërkuar disa herë falje dhe lirimin e parakohshëm, por këto kërkesa janë refuzuar nga Gatti Santana. Në kërkesën e tij të fundit, ai pranoi përgjegjësinë për krimet e kryera dhe shpjegoi se disa anëtarë të Shtabit të Përgjithshëm kishin synuar kryerjen e gjenocidit, por nuk kishin mjaftueshëm forca për të realizuar ekzekutimet pa ndihmën e Korpusit Drina, që ai komandonte në atë kohë.
Krstiq, i cili është 76 vjeç, ka kërkuar që të merren parasysh problemet e tij shëndetësore, duke përmendur dhimbjet nga sëmundje kronike dhe komplikime pas amputimit të këmbës. Ai gjithashtu ka kërkuar që të lirohet, duke shprehur dëshirën që një ditë të shkojë në Potoçari, të përkulej para viktimave dhe të kërkonte falje, nëse do të lejohej nga familjarët e viktimave.
Në refuzimin e kërkesës për lirim të parakohshëm, kryetarja Gatti Santana shprehu dyshime mbi rehabilitimin e mjaftueshëm të Krstiqit. Ky vendim u mor në shkurt të këtij viti.
Forcat e Ushtrisë së Republikës Serbe vranë më shumë se 8000 burra dhe djem boshnjakë në Srebrenicë në korrik të vitit 1995. Më shumë se 50 individë janë dënuar për gjenocid dhe krime të tjera, përfshirë presidentin e atëhershëm të Republikës Serbe, Radovan Karaxhiq, dhe komandantin e Ushtrisë, Ratko Mladiq, të dy të cilët janë dënuar me burgim të përjetshëm. /Telegrafi/
MARKETING
