Hungaria ashpërson qëndrimin ndaj Ukrainës, i kërkon të rivendosë të drejtat e pakicave

Kryeministri hungarez, Viktor Orban në një deklaratë theksoi se Hungaria nuk do ta mbështesë më Ukrainën në asnjë çështje në forumet ndërkombëtare.

“Ky qëndrim do të jetë i vlefshëm derisa Ukraina të rivendosë të drejtat që qytetarët me origjinë hungareze kanë në territorin e saj,” sipas kryeministrit hungarez.

Budapesti akuzon Kievin se të drejtat për rreth 150,000 qytetarë me origjinë hungareze që jetojnë në Ukrainë janë kufizuar, ata nuk mund të përdorin gjuhën e tyre amtare, veçanërisht në arsim.

Deklarata vjen pasi Ukraina miratoi një ligj në vitin 2017, i cili vendosi kufizime në përdorimin e gjuhëve të pakicave në shkolla.

Kohët e fundit Ukraina ka qenë në konflikt me fqinjët e saj perëndimorë, përkatësisht Poloninë, Sllovakinë dhe Hungarinë, për eksportet e grurit. Ukraina paraqiti një apel në Organizatën Botërore të Tregtisë (OBT) kundër Polonisë, Hungarisë dhe Sllovakisë për refuzimin e tyre për të hequr ndalimin e importit të produkteve të saj bujqësore.

Siç kishte raportuar Ministria e Financave e Ukrainës, Kievi i konsideron këto ndalime shkelje të detyrimeve ndërkombëtare të këtyre vendeve anëtare të BE-së.

Polonia, Hungaria dhe Sllovakia kishin njoftuar kufizimet e tyre në importet e grurit të Ukrainës pasi Komisioni Evropian vendosi të mos zgjasë ndalimin e importit në pesë vendet anëtare të Evropës Lindore të Ukrainës.

Ndalimet e vendosura nga vendet e Evropës Qendrore kanë për qëllim mbrojtjen e fermerëve nga rritja e eksporteve të grurit nga Ukraina pas bllokadës së Rusisë ndaj porteve ukrainase të Detit të Zi.

MARKETING