Gjermania: Samiti i BE-së do të diskutojë skenarin “realist” pas luftës së Gazës

Sipas një zyrtari të lartë të qeverisë gjermane, samiti i Bashkimit Evropian (BE) do të diskutojë një skenar “realist” pas luftës së Gazës kur liderët e bllokut evropian të takohen nesër dhe pasnesër në Bruksel, transmeton Anadolu.

“Është e rëndësishme që të kemi një perspektivë politike për palestinezët dhe të krijojmë një skenar realist të ditës pas”, u tha zyrtari gazetarëve në Berlin.

Zyrtari tha se BE-ja mund të luajë një “rol të rëndësishëm” në rindërtimin e Gazës së shkatërruar nga lufta, jo vetëm për sa i përket financimit, por edhe organizimit të rindërtimit masiv të enklavës së pushtuar nga Izraeli.

Izraeli ka vrarë pothuajse 32 mijë palestinezë në Rripin e Gazës që nga inkursioni i Hamasit më 7 tetor që sipas Tel Avivit mori afër 1.200 jetë. Sulmi ushtarak izraelit e ka kthyer territorin në gërmadha dhe ka çuar në kushte të urisë.

Zyrtari gjerman gjithashtu theksoi bisedimet e vazhdueshme diplomatike intensive për lirimin e pengjeve izraelite në Gaza.

“Ka propozime të ndryshme, por deri më tani nuk ka marrëveshje”, tha ai.

Çështja e një marrëveshjeje pengjesh, sipas zyrtarit, është e lidhur “shumë ngushtë” me temën e një armëpushimi më të gjatë.

“Çështja është se kur do të arrijmë në pikën për të arritur një armëpushim më të gjatë”, u shpreh ai.

Më herët gjatë ditës, kancelari gjerman, Olaf Scholz, bëri thirrje për një armëpushim afatgjatë, duke theksuar se ekziston një nevojë urgjente për të ofruar më shumë ndihma humanitare për civilët palestinezë.

“Ajo që tani duhet të arrihet sa më parë është një armëpushim disi më i gjatë”, u tha Scholz ligjvënësve, duke shtuar se kjo mund të mundësojë dërgimin e ndihmës humanitare dhe lirimin e pengjeve të mbajtura nga Hamasi.

Kancelari gjerman tha se është optimist për bisedimet e vazhdueshme të armëpushimit dhe theksoi se Gjermania me angazhimet e saj diplomatike gjithashtu po përpiqet të kontribuojë në një rezultat pozitiv këtu.

“Nuk dua të jap shpresë të rreme këtu, por kam përshtypjen se për momentin është më realiste sesa ka qenë për një kohë të gjatë”, shtoi ai.

MARKETING