Gaza, të paktën 34 të vrarë në sulmet izraelite ndaj dy shkollave që strehonin palestinezë të zhvendosur

Të paktën 34 persona u vranë sot në sulme ajrore izraelite ndaj dy shkollave që strehonin civilë të zhvendosur në Qytetin e Gazës, njoftojnë autoritetet, transmeton Anadolu.

Mbrojtja Civile Palestineze në Gaza tha se 31 palestinezë, përfshirë fëmijë dhe gra, u vranë në një sulm ajror që synoi shkollën “Dar Al-Arqam” në lagjen Tuffah, ku janë strehuar qindra civilë.

Raportohet se gjashtë viktima janë të zhdukur, ndërsa dhjetëra të plagosur.

Zyra për Media e Gazës tha më herët se 29 palestinezë, duke përfshirë 18 fëmijë dhe një grua, u vranë dhe më shumë se 100 u plagosën nga sulmi.

Ushtria izraelite e pranoi sulmin dhe pretendoi se “elementët e Hamasit përdorën qendrën e komandës dhe kontrollit (shkollën) për të planifikuar dhe ekzekutuar sulme kundër civilëve dhe trupave izraelite”.

Ushtria pohoi se para sulmit, “u morën hapa të shumtë për të zbutur dëmin ndaj civilëve, duke përfshirë përdorimin e mbikëqyrjes ajrore dhe inteligjencës shtesë”, megjithëse nuk dha asnjë provë për të mbështetur këto pretendime.

Ndërkaq, Spitali Baptist Al-Ahli ka pranuar trupat e tre palestinezëve të vrarë në një sulm ajror në shkollën “Fahd Al-Sabah”, e cila strehon qindra banorë të zhvendosur, thanë burime mjekësore për Anadolu.

Sulmet ishin të fundit në ofensivën e rifilluar izraelite ka vrarë më shumë se 1.160 viktima dhe ka plagosur mbi 2.700 që nga 18 marsi, duke shkelur armëpushimin e janarit dhe marrëveshjen e shkëmbimit të të burgosurve midis Izraelit dhe grupit të rezistencës palestineze Hamas.

Gjithsej, mbi 50.500 palestinezë, kryesisht gra dhe fëmijë, janë vrarë në sulmet brutale izraelite në Rripin e Gazës që nga tetori i vitit 2023.

MARKETING