Fidan: Projekti i Netanyahu-t për të vjedhur tokat palestineze vazhdon me mbështetjen perëndimore

Ministri i Punëve të Jashtme i Türkiyes, Hakan Fidan, është ftuar në redaksinë e editorëve të Anadolut, ku po flet për çështje rajonale dhe ndërkombëtare.
Fidan për sulmet në Liban tha se jemi duke parë se “Izraeli hap pas hapi po fillon të përshkallëzojë sulmet e tij drejt Libanit”.

Lidhur me çështjen palestineze, ai tha se “projekti” i kryeministrit izraelit, Benjamin Netanyahu, për “të vjedhur të gjitha tokat palestineze vazhdon me mbështetjen perëndimore”.

“Palestina nuk është një temë që prek vetëm palestinezët apo vetëm arabët, por është një temë që prek të gjithë muslimanët”, tha Fidan.

Aktualisht, theksoi ai, “mendja fanatike në Izrael po zbaton një politikë që është larg mendjes së shëndoshë dhe e krijuar për të shkatërruar”.

Duke folur për Sirinë, Fidan tha se beson se nëse ka një zgjidhje në mënyrën që dëshiron Türkiye, Siria do të jetë në gjendje t’i zgjidhë problemet e tjera më lehtë.

Më tej, ai foli edhe për marrëdhëniet e vendit të tij me vendet perëndimore.

“Në marrëdhëniet e tyre me Türkiyen, vendet evropiane sillen sikur të jetë e djathta ekstreme në pushtet. Nëse e djathta ekstreme vjen në pushtet, asgjë nuk ndryshon për ne”, tha Fidan.

Ballkani

Shefi i diplomacisë turke foli edhe për vendet e Ballkanit, përfshirë për çështjën e Kosovës dhe Serbisë.

“Ne jemi një vend që historikisht e kemi mbështetur pavarësinë e Kosovës dhe do të vazhdojmë ta bëjmë këtë”, tha Fidan.

Ai foli edhe për Bosnjë e Hercegovinën (BeH), duke theksuar se Türkiye çdoherë do të mbështesë edhe sovranitetin dhe integritetin territorial të BeH-së, siç ka bërë deri tani.

“Türkiye ka një rol të rëndësishëm në Ballkan, në këtë aspekt vizioni ynë është ruajtja e paqes dhe stabilitetit në rajon”, tha Fidan.

MARKETING