Ekuador, arrestohen 6 kolumbianë për vrasjen e kandidatit për president

Pasi kandidati presidencial, Fernando Villavicencio humbi jetën në një sulm të armatosur në Ekuador, janë ndaluar 6 kolumbianë që mendohej se kishin lidhje me incidentin, transmeton Anadolu.

Gjashtë persona u arrestuan pasi kandidati presidencial Villavicencio, i njohur për “qëndrimin e tij kundër korrupsionit” përpara zgjedhjeve presidenciale të planifikuara për në 20 gusht në Ekuador, humbi jetën në një sulm të armatosur më 9 gusht. Thuhet se personat në fjalë ishin kolumbianë.

Sipas lajmit të Associated Press (AP) bazuar në raportin e ndalimit, të dyshuarit janë kapur të fshehur në një shtëpi në kryeqytetin Quito. Në raport thuhet se u sekuestruan një automjet, një motoçikletë, municione si dhe armë dhe granata.

Ministri i Brendshëm i Ekuadorit, Juan Zapata e përshkroi sulmin si “një krim politik të natyrës terroriste me qëllim sabotimin e zgjedhjeve të 20 gushtit”.

Ndërsa në raportin e policisë nuk jepet informacion nëse të arrestuarit i përkisnin ndonjë organizate apo jo, Zapata deklaroi se të dyshuarit kishin lidhje me krimin e organizuar.

– Sulm me armë në Villavicencio

Ekipi i fushatës zgjedhore njoftoi se Villavicencio u vra me tre të shtëna në kokë nga sulmuesi teksa ai po hipte në automjetin e tij pas një aktiviteti ku mori pjesë në Quito.

Prokurori i Përgjithshëm i Ekuadorit tha se i dyshuari që kreu sulmin u qëllua në një shkëmbim zjarri me forcat e sigurisë dhe vdiq si pasojë e plagëve të rënda.

Gjithashtu thuhet se nga sulmi u plagosën 9 persona, mes tyre një kandidat për deputet dhe 2 policë.

Villavicencio tha se ai kishte marrë kërcënime me vdekje nga disa persona, përfshirë udhëheqësit e kartelit “Sinaloa” të Meksikës, një nga grupet ndërkombëtare të krimit të organizuar që vepron në Ekuador.

MARKETING