Çdo vit 20 studentë nga RMV do të marrin bursa për studime në Hungari
Studentët e Maqedonisë së Veriut do të mund të përdorin 20 bursa në vit për të studiuar në Hungari në gjuhën hungareze ose në një gjuhë të huaj. Ministria e Arsimit dhe Shkencës njoftoi sot se përparësi do t’u jepet aplikantëve që duan të studiojnë në fushat e shkencës, teknologjisë, inxhinierisë dhe matematikës (STEM), si dhe shkencave mjekësore dhe shëndetësore dhe bujqësisë.
MARKETING
Memorandumi i Mirëkuptimit që rregullon bashkëpunimin në kuadër të Programit të Bursave “Hungaricum” për periudhën 2026-2028 u nënshkrua sot nga Ministrja e Arsimit dhe Shkencës, Vesna Janevska dhe Ministri hungarez i Punëve të Jashtme dhe Tregtisë Peter Szijarto.
Memorandumi përcakton që studentët do të marrin tarifa të paguara për shkollim, akomodim në konviktet studentore në kampusin e institucionit të arsimit të lartë ose fonde për të mbuluar kostot e akomodimit, të drejtën për shërbime shëndetësore, përdorimin e shërbimeve falas të bibliotekës, si dhe një pagesë mujore për të mbuluar shpenzimet bazë.
“Ministrat Janevska dhe Szijarto ranë dakord që nënshkrimi i Memorandumit konfirmon dhe forcon marrëdhëniet miqësore midis dy vendeve dhe promovon bashkëpunimin në fushën e arsimit të lartë, në interes të zhvillimit të një shoqërie të bazuar në dije”, thuhet në deklaratë.
Bursat do të jepen për studime universitare me kohë të plotë, pasuniversitare, master dhe doktoraturë. Gjithashtu, për studime të shkurtuara nga tre deri në dhjetë muaj për fitimin e krediteve akademike.
MARKETING
