Biden në mbledhjen e kabinetit izraelit të luftës: “Nuk jeni vetëm”
Presidenti i SHBA-së Joe Biden mori pjesë në një takim të kabinetit izraelit të luftës sot dhe u takua me kryeministrin Benjamin Netanyahu, ku tha se SHBA-ja “do të vazhdojë ta mbështesë Izraelin”, raporton Anadolu.
“Nuk jeni vetëm. Sepse e theksova më herët, ne do të vazhdojmë të mbështesim Izraelin derisa ju punoni për të mbrojtur popullin tuaj” tha Biden gjatë takimit në Tel Aviv.
Ai shtoi se SHBA-ja do të vazhdojë të punojë me Izraelin dhe partnerët në gjithë rajonin për të “parandaluar më shumë tragjedi ndaj civilëve të pafajshëm”.
Netanyahu, nga ana e tij, tha se kjo do të jetë një “lloj tjetër lufte” sepse Hamasi është një “lloj tjetër armiku” dhe akuzoi Hamasin për maksimizimin e viktimave civile ndërsa Izraeli kërkon “të minimizojë viktimat civile”.
Vizita e Bidenit erdhi një ditë pasi të paktën 471 njerëz u vranë në një sulm ajror izraelit në Spitalin Baptist Al-Ahli.
Biden tha të martën se ishte “thellësisht i pikëlluar nga shpërthimi” në spital që la qindra të vdekur.
“Jam i indinjuar dhe thellësisht i pikëlluar nga shpërthimi në spitalin arab Al-Ahli në Gaza dhe humbja e tmerrshme e jetëve që rezultoi”, tha ai në një deklaratë
Pas takimit me Netanyahun, Biden u pyet se çfarë e bëri të sigurt se izraelitët nuk ishin pas sulmit ndaj spitalit.
“Të dhënat që më janë treguar nga departamenti im i mbrojtjes”, tha ai.
Biden kishte planifikuar të vizitonte Jordaninë për të takuar mbretin Abdullah II të Jordanisë, presidentin palestinez Mahmud Abbas dhe udhëheqësin egjiptian Abdel Fattah al-Sisi, por samiti katërpalësh u anulua pas sulmit izraelit në spital.
MARKETING
