BE pranon propozimin spanjoll për mbajtjen e një konference të paqes Izrael-Palestinë

Kryeministri i Spanjës, Pedro Sanchez, tha se Këshilli i Bashkimit Evropian ka pranuar propozimin e Spanjës për të organizuar një konferencë ndërkombëtare të paqes Izrael-Palestinë brenda gjashtë muajve të ardhshëm, raporton Anadolu.

Duke folur nga Brukseli, Sanchez tha se tani është koha për të ofruar një “vizion konkret” të paqes për rajonin “për të gjetur një zgjidhje përfundimtare që lejon bashkëjetesën e dy shteteve, Izraelit dhe Palestinës, në paqe dhe siguri”.

Kryeministri soanjoll tha se diplomatët tashmë kanë bërë kontakte me vendet në OKB për të “gjetur zgjidhje politike për t’i dhënë fund kësaj krize, e cila ka vazhduar për një kohë të gjatë”. Sanchez tha gjithashtu se ai ndau idenë e një konference me kryeministrin izraelit Benjamin Netanyahu në një telefonatë fundjavën e kaluar.

Spanja gjithashtu bëri përpjekje në nivel evropian për të fituar mbështetje për gjuhën e armëpushimit. Por Sanchez pranoi se kushti i konsensusit i BE-së e uli tonin në “korridore humanitare dhe pauza për nevoja humanitare”.

“Pamjet që po shohim të popullatës civile në Gaza, veçanërisht fëmijëve, që vuajnë nga ky rrethim dhe ky bombardim, janë absolutisht të papranueshme, kështu që ne duhet të veprojmë urgjentisht”, tha Sanchez, duke dënuar gjithashtu “sulmin terrorist të Hamasit” të 7 tetorit.

Transmetuesi spanjoll Cadena Ser raporton se konferenca e paqes po planifikohet në Madrid. Deri në fund të vitit, Spanja është kryesuese e Këshillit të Bashkimit Evropian.

Sanchez tha se “serioziteti” i krizës që po shpaloset në Izrael dhe Palestinë “kërkon që komuniteti ndërkombëtar të veprojë me urgjencë dhe guxim” për t’i dhënë fund dhunës. Ai tha gjithashtu se Spanja do të “punojë pa u lodhur” që Evropa të marrë një pozicion udhëheqës.

Në deklaratën e arritur me vështirësi, të lëshuar nga Këshilli Evropian mbrëmë vonë, thuhet: “Bashkimi Evropian është i gatshëm të kontribuojë në ringjalljen e një procesi politik mbi bazën e zgjidhjes me dy shtete, duke përfshirë përpjekjet e Ditës së Paqes, dhe mirëpret iniciativat diplomatike për paqe dhe siguri, si dhe mbështet mbajtjen së shpejti të një konference ndërkombëtare të paqes”.

MARKETING