Autoritetet në Gaza: Izraeli rrëmbeu 15 punonjës mjekësorë në Rafah
Zyra për media e qeverisë së Gazës akuzoi ushtrinë izraelite për rrëmbimin e 15 punonjësve mjekësorë dhe personelit të mbrojtjes civile në qytetin jugor Rafah, transmeton Anadolu.
“Ushtria okupatore izraelite vazhdon krimet e saj kundër popullit palestinez në shkelje të hapur të ligjit ndërkombëtar humanitar”, tha zyra në një deklaratë.
Ajo tha se 15 reagues emergjence u rrëmbyen në Rafah teksa po shpëtonin të plagosurit në perëndim të qytetit Rafah, duke e mbajtur Izraelin dhe administratën amerikane përgjegjëse për sigurinë e personelit dhe duke e quajtur përshkallëzimin “një krim lufte që kërkon përgjegjësi të menjëhershme”.
“Okupimi izraelit po synon qëllimisht punonjësit mjekësorë dhe të ndihmës, në kundërshtim të drejtpërdrejtë me marrëveshjet ndërkombëtare që garantojnë sigurinë e tyre”, tha ajo.
Zyra e medias i bëri thirrje komunitetit ndërkombëtar, OKB-së, Komitetit Ndërkombëtar të Kryqit të Kuq dhe organizatave të të drejtave të njeriut që të ndërmarrin veprime urgjente për të siguruar lirimin e robërve.
Të dielën, Shoqata Palestineze e Gjysmëhënës së Kuqe tha se forcat izraelite shënjestruan dhe rrethuan disa punonjës mjekësorë në Rafah gjatë një operacioni shpëtimi.
Ushtria izraelite nisi një fushatë të befasishme ajrore në Rripin e Gazës më 18 mars, duke vrarë afro 800 njerëz, duke plagosur mbi 1.600 të tjerë dhe duke prishur marrëveshjen e armëpushimit dhe shkëmbimit të të burgosurve që u arrit në janar.
Më shumë se 50.100 palestinezë janë vrarë, kryesisht gra dhe fëmijë, dhe mbi 113.700 janë plagosur në sulmet brutale ushtarake izraelit në Gaza që nga tetori 2023.
Gjykata Ndërkombëtare Penale lëshoi urdhra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
MARKETING
