Arrestohet edhe një person për arratisjen e Faton Hajrizit nga burgu i Smrekonicës

Është arrestuar edhe një person pasi dyshohet se e kishte ndihmuar Faton Hajrizin të arratisej nga burgu.

Lajmin e ka konfirmuar për Reporteri.net, zëdhënësi i Prokurorisë Themelore në Mitrovicë, Valon Preteni.

“I dyshuari është arrestuar rreth orës 16:00 dhe i janë caktuar 48 orë paraburgim”, tha Preteni për Reporteri.net.

Edhe dje u arrestua një person për arratisjen e Faton Hajrizit. Këtë e konfirmoi dje Policia e Kosovës për Reporteri.net.

“Policia e Kosovës, Drejtoria për Hetimin e Krimit të Organizuar dhe Krimeve të Rënda ka zhvilluar hetime në lidhje me arratisjen e ndodhur ditë më parë në Qendrën Korrektuese në Smrekonicë. Për të gjitha veprimet hetimore është konsultuar prokurori kompetent, me vendim të të cilit personi i dyshuar është ndaluar për 48 orë”, thanë dje nga Policia e Kosovës për Reporteri.net.

Faton Hajrizi kishte një historik të gjatë arratisjesh nga burgu.

Për herën e nëntë dhe të fundit, ai u arratis, më 6 korrik derisa ndodhej në Qendrën Korrektuese në Smrekonicë. Pak ditë më vonë u bë i dyshuar për vrasjen e një polici në Serbi dhe u vra deri sa ishte në arrati nga autoritetet serbe të premten, më 19 korrik.

Pas rreth 40 orësh kërkimesh, Faton Hajrizi të premten është lokalizuar dhe vrarë nga policia serbe.

MARKETING