Presidenti iranian: Teherani do të përgjigjet në të njëjtën mënyrë nëse SHBA-ja përmbush angazhimet e saj

Presidenti iranian, Masoud Pezeshkian tha të martën se Teherani do të përgjigjet menjëherë nëse SHBA-ja rikthehet te angazhimet e saj sipas Memorandumit të Mirëkuptimit të Islamabadit, sipas presidencës iraniane, transmeton Anadolu.

MARKETING

“E them qartë se nëse SHBA-të rikthehen te angazhimet e tyre sipas memorandumit, Republika Islamike e Iranit do të përgjigjet menjëherë”, tha Pezeshkian në fjalimin e tij në Samitin e 26-të të Organizatës së Bashkëpunimit të Shangait (SCO) në Bishkek, kryeqytetin e Kirgistanit

Ai akuzoi Washingtonin se nuk e ka respektuar marrëveshjen më pak se dy javë pas nënshkrimit të saj, duke thënë se shkeljet amerikane janë përballur me një përgjigje proporcionale nga Teherani.

Pezeshkian tha se marrëveshja u arrit pas 40 ditësh luftime dhe gati tre muaj negociatash të ndërmjetësuara nga Pakistani dhe Katari.

Ai pretendoi se SHBA-ja u detyrua të pranonte armëpushimin pasi nuk arriti objektivat e saj gjatë konfliktit.

Memorandumi u arrit në qershor pas ndërmjetësimit të Pakistanit dhe Katarit, pas konfliktit ushtarak Iran-SHBA. Marrëveshja përfshinte dispozita për përfundimin e armiqësive, Ngushticën e Hormuzit dhe negociata të mëtejshme mes Teheranit dhe Washingtonit.

Duke iu referuar SCO-së, Pezeshkian propozoi krijimin e një banke, një bashkimi për sigurimin e eksporteve dhe investimeve, si dhe një konsorciumi energjetik si tri masa për forcimin e rolit të organizatës, sipas presidencës.

Samiti i SCO-së mbledh liderët e 10 shteteve anëtare për të diskutuar sigurinë rajonale, si dhe bashkëpunimin politik dhe ekonomik.

E themeluar në vitin 2001, SCO përbëhet nga Bjellorusia, Kina, India, Irani, Kazakistani, Kirgistani, Pakistani, Rusia, Taxhikistani dhe Uzbekistani. Irani u bë anëtar i plotë në vitin 2023.

MARKETING