Hungaria shënon pjesëmarrje të hershme rekord në zgjedhjet kyç parlamentare

Hungaria ka shënuar një pjesëmarrje të hershme në votime prej 54,14 për qind deri në orën 13:00 në zgjedhjet parlamentare të sotme, sipas të dhënave të publikuara nga Zyra Kombëtare e Zgjedhjeve, transmeton Anadolu.

Krahasuar me vitet e mërparshme, dalja ishte 40,01 për qind në zgjedhjet e vitit 2022, 42,32 për qind në vitin 2018, 34,33 për qind në vitin 2014 dhe 35,88 për qind në vitin 2010.

Kryeministri hungarez dhe lideri i partisë në pushtet Fidesz, Viktor Orban, bëri thirrje për pjesëmarrje më të lartë në votime teksa hodhi votën e tij në Budapest, duke thënë se “sa më shumë të jemi, aq më mirë do të jetë”.
Ai tha se qeveria ka bërë përparim drejt objektivave kryesore, por duhet të përshpejtojë përpjekjet e saj, duke theksuar se do ta pranojë rezultatin dhe do të respektojë vullnetin e votuesve.

Ndërkohë, Peter Magyar, lider i partisë kryesore opozitare Tisza, u bëri thirrje votuesve të marrin pjesë në zgjedhje, duke e quajtur votimin “vendimtar” dhe duke paralajmëruar se ai do të përcaktojë drejtimin politik të Hungarisë.
Më shumë se 8 milionë votues me të drejtë vote po hedhin votën për të zgjedhur anëtarët e Kuvendit Kombëtar me 199 vende.

Sipas sistemit zgjedhor, 106 deputetë zgjidhen në zona njëmandatëshe, ndërsa 93 vende ndahen përmes listave partiake kombëtare, me një prag prej 5 për qind të nevojshëm për të hyrë në parlament.

Këto zgjedhje konsiderohen si një nga garat më konkurruese gjatë mandatit të Orbanit, ndërsa partia e tij Fidesz përballet me një opozitë më të konsoliduar.

Partia Tisza ka fituar mbështetje në sondazhet e fundit.

MARKETING