Franca vendos ndalimin e rrjeteve sociale për fëmijët nën 15 vjeç

Ligjvënësit francezë kanë miratuar një projektligj që do të ndalojë përdorimin e mediave sociale nga fëmijët nën moshën 15 vjeç, një veprim i mbështetur nga Presidenti Emmanuel Macron si një mënyrë për të mbrojtur të miturit.

Projektligji u miratua nga dhoma e ulët e parlamentit, Asambleja Kombëtare, me 130 vota pro dhe 21 kundër, pas një seance të gjatë të hënën në mbrëmje.

Legjislacioni tani do t’i dërgohet Senatit për shqyrtim të mëtejshëm përpara se të bëhet ligj.

Macron e mirëpriti votimin përmes X, duke e quajtur atë një “hap të madh” drejt mbrojtjes së fëmijëve dhe adoleshentëve francezë.

Ai tha se tani i takon Senatit të vazhdojë këtë “punë konstruktive” në mënyrë që ndalimi të hyjë në fuqi që nga fillimi i vitit të ardhshëm shkollor.

“Sepse mendjet e fëmijëve tanë nuk janë në shitje. As për platformat amerikane, as për rrjetet kineze”, tha ai.

“Sepse ëndrrat e tyre nuk duhet të diktohen nga algoritmet. Sepse nuk duam një brez të shqetësuar, por një brez që beson te Franca, Republika dhe vlerat e saj.”

Presidenti përfundoi duke thënë se do ta sigurojë këtë deri më 1 shtator dhe se fëmijët dhe adoleshentët francezë “më në fund do të jenë të mbrojtur”.

MARKETING