SHBA kapin cisternën ruse pas ndjekjeje disajavore në Atlantik, tensionet me Moskën
Një helikopter i vogël amerikan në formë veze fluturoi mbi valët e stuhishme të Atlantikut, pastaj u ngrit mbi anijen e naftës që mbante flamurin rus. Katër komandot ishin në pjesën e jashtme të “Little Bird”, ata zbritën me litarë të gjatë deri në kuvertën e anijes dhe e morën nën kontroll me armët gati.
Kjo ishte skena finale e një ndjekjeje trejavore në oqean, që shënon një përshkallëzim të tensioneve për naftën mes Shtëpisë së Bardhë dhe Kremlinit. Në të njëjtën kohë, forcat speciale amerikane në Karaibe kapën një tjetër supertanker, “Sophia”, një nga 16 anijet që kishin lundruar së fundmi nga bregdeti i Venezuelës.
Të dy anijet ishin goditur nga sanksionet amerikane: prej vitesh transportonin naftë mes Venezuelës, Iranit, Kinës dhe Rusisë në shkelje të embargove. Që nga gjysma e dhjetorit, Donald Trump vendosi një bllokadë detare, duke ndaluar eksportet nga Caracas, siç theksoi dje ministri i Mbrojtjes, Pete Hegseth, lundrimi lejohet vetëm për anijet e autorizuara nga SHBA.
“Tanker-i Bella 1” ishte i vetmi që ia kishte dalë të shmangte bllokadën. Me gjatësi 333 metra dhe gjerësi 60 metra, ai po lëvizte bosh drejt Venezuelës dhe kishte në mënyrë formale shtetësi të Gujanës. Anija menjëherë ndryshoi drejtimin dhe u largua. Më 17 dhjetor, amerikanët tentuan ta ndalonin në Antile. Në ujërat ndërkombëtare, një patrullë e Gardës Bregdetare iu afrua, ndërsa një Blackhawk qëndroi i pezulluar mbi trupin e anijes, gati për të zbarkuar komandot. Kapiteni refuzoi inspektimin dhe ktheu anijen me shpejtësi drejt Atlantikut.
Më pas, anija çaktivizoi sistemin e gjurmimit. Kur e rindizte më 1 janar, kishte ndryshuar emrin dhe flamurin, u quajt “Marinera” dhe u regjistrua në Soçi të Rusisë. Për ta bërë këtë ndryshim të dukshëm, flamuri rus u pikturua mbi muret e anijes. Amerikanët nuk e humbën kurrë nga vëmendja: një patrullë e madhe e Gardës Bregdetare e ndiqte me armë, shpesh duke u futur në rrugën e saj. Nga anija e larguar u filmua ndjekja dhe pamjet transmetoheshin nga televizioni rus “Russia Today”, duke treguar mbështetjen e Kremlinit. Më tej, Moska dërgoi një nëndetëse bërthamore dhe njësi të tjera ushtarake për t’ia shoqëruar. Të martën, një avion Tupolev hyri në zonë, i shoqëruar nga dy interceptues të Forcave Ajrore Mbretërore.
Pas sulmit në Caracas që kapoi Nicolás Maduro-n, Trump vendosi të ndërhynte. Avionët dhe helikopterët e forcave speciale u transferuan në Britani: një “Little Bird” dhe një Blackhawk u ulën në anijet ushtarake më afër objektivit. Dje në mesditë, Shtëpia e Bardhë dha dritën jeshile për ndërhyrjen. Operacioni zgjati pak minuta. Një qendër operative mbi një Hercules koordinonte veprimin nga lart, ndërsa një avion artilerie fluturuese “Ghostrider” qëndronte afër. Katër komandot e parë, të zbritur nga helikopteri, ndoshta Navy SEALs të njëjtës njësitë që kishin vrarë Bin Laden nuk hasën rezistencë. Më pas iu bashkuan një ekip i dytë dhe morën kontrollin e anijes, duke e detyruar të ndryshojë drejtimin, ndërsa duket se po shkon drejt një porti britanik. Në të njëjtën kohë, në Antile komandot kapën “Sophia”-n, e cila tani po drejtohet drejt SHBA-ve.
Derimë tani, Moska ka kufizuar reagimin në protesta diplomatike. Nëndetësja bërthamore nuk u pa në horizont. Administrata Trump nuk e konsideron anijen si ruse; e quan me emrin e mëparshëm “Bella 1” dhe e përshkruan si pjesë të “flotës së errët venezueliane”. Edhe pse Rusia kërkoi lirimin e ekuipazhit të saj, SHBA-ja deklaroi se ekuipazhi mund të përballet me gjykim amerikan, një tjetër veprim që mund të rrisë tensionet me Kremlinin.
MARKETING
