Të paktën 15 të vrarë në sulmin izraelit ndaj tendave me palestinezë të zhvendosur në jug të Gazës

Të paktën 15 palestinezë u vranë sot herët kur avionët luftarakë izraelitë shënjestruan tendat që strehonin familje të zhvendosura në zonën Al-Mawasi në perëndim të Khan Younisit në Gazën jugore, njoftojnë burime lokale, transmeton Anadolu.

Shumica e viktimave ishin anëtarë të së njëjtës familje, tenda i së cilës u godit drejtpërdrejt, thanë dëshmitarë okularë për Anadolu. Disa të tjerë u plagosën në sulm.

Agjencia palestineze e lajmeve Wafa raportoi se artileria izraelite goditi gjithashtu tendat që strehonin civilë të zhvendosur në Rafah, në Gazën jugore, duke shkaktuar viktima të mëtejshme.

Në një incident të veçantë, forcat izraelite shkatërruan disa shtëpi banimi në Khan Younis veriore, sipas dëshmitarëve okularë.

Sulmet e fundit vijnë vetëm një ditë pasi më shumë se 100 palestinezë u vranë në gjithë Rripin e Gazës, përfshirë 51 persona që humbën jetën ndërsa po prisnin ndihmë humanitare, sipas raportimeve lokale.

Pavarësisht thirrjeve ndërkombëtare për armëpushim, ushtria izraelite ka kryer një luftë gjenocidale në Gaza, duke vrarë më shumë se 57.100 palestinezë, shumica prej tyre gra dhe fëmijë, që nga tetori i vitit 2023.

Nëntorin e kaluar, Gjykata Ndërkombëtare Penale lëshoi ​​urdhra arresti për kryeministrin Benjamin Netanyahun dhe ish-ministrin e tij të Mbrojtjes, Yoav Gallant, për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.

MARKETING