Erdoğan për sul’met izraelite: Asnjë person me ndërgjegje nuk mund ta pranojë apo justifikojë një mas’akër të tillë

Presidenti i Türkiyes, Recep Tayyip Erdoğan, ka dënuar veprimet e fundit ushtarake të Izraelit në Liban, transmeton Anadolu.

Në llogarinë e tij në platformën sociale X, presidenti Erdoğan tha se “politika e gjenocidit, okupimit dhe pushtimit”, që ka vazhduar që nga 7 tetori i vitit të kaluar, tani synon Libanin dhe popullin libanez.

Ai shprehu shqetësim të thellë për humbjen e jetëve libaneze, duke përfshirë fëmijët, në ato që ai i përshkroi si “sulme brutale”.

Erdoğan kritikoi komunitetin ndërkombëtar për mundësimin e veprimeve të Izraelit, duke theksuar se derisa Tel Avivi vazhdon të marrë “mbështetje armësh dhe municioni nga mbështetësit e tij”, ai bëhet “gjithnjë e më i pamatur, duke sfiduar të gjithë njerëzimin, vlerat humanitare dhe ligjin ndërkombëtar”.

Ai theksoi se “politika e çmendurisë” e Izraelit, e parë tashmë në Gaza dhe Ramallah, nuk duhet të lejohet të përhapet në Liban dhe vende të tjera të rajonit.

“Asnjë person me ndërgjegje nuk mund ta pranojë, justifikojë apo konsiderojë të ligjshme një masakër të tillë”, theksoi ai.

Presidenti turk u bëri thirrje organizatave globale, veçanërisht Këshillit të Sigurimit të OKB-së dhe grupeve të të drejtave të njeriut, që të ndërmarrin veprime të shpejta në përgjigje të agresionit të Izraelit.

Ai gjithashtu i kërkoi botës islame që të mbajë një “qëndrim më të fortë” kundër këtyre sulmeve.

Duke ri-afirmuar mbështetjen e Türkiyes, presidenti Erdoğan tha se vendi i tij “do të vazhdojë të qëndrojë me popullin dhe qeverinë libaneze gjatë këtyre kohërave të vështira”.

Ai gjithashtu u shprehu ngushëllime të prekurve, duke dënuar “sulmet çnjerëzore” të Izraelit dhe duke u uruar shërim të shpejtë të plagosurve.

MARKETING