DASH: Nuk mbështesim asnjë ndryshim në statusin aktual të urës së Ibrit, Qeveria të mos veprojë njëanshëm

Departamenti Amerikan i Shtetit ka deklaruar se nuk mbështet asnjë ndryshim në statusin aktual të urës së Ibrit në Kosovë.

Kështu u shpreh një zëdhënës i DASh-it për “Pavlovic Today”.

“Shtetet e Bashkuara nuk mbështesin asnjë lëvizje për të ndryshuar statusin aktual të Urës së Mitrovicës në këtë moment. Hapja e urës për lëvizjen e automjeteve tani rrit potencialin për dhunë dhe vë në rrezik popullatën vendase si dhe ushtarët e KFOR-it – përfshirë amerikanët – të cilët po punojnë për të mbështetur paqen dhe sigurinë në Kosovë”, ka deklaruar zëdhënësi i DASh-it.

DASh bëri thirrje që Qeveria e Kosovës të përmbahet nga “veprimet njëanshme dhe të adresojë çështjen brenda kuadrit të dialogut të lehtësuar nga BE”.

“Ne i bëjmë thirrje Qeverisë së Kosovës që të mos ndërmarrë këtë veprim të pakoordinuar dhe njëanshëm dhe të diskutojë çështjen brenda dialogut të lehtësuar nga BE,” tha zëdhënësi.

Departamenti i Shtetit theksoi se ky qëndrim është në përputhje me atë të partnerëve të QUINT-it, si dhe të BE-së dhe NATO-s.

Qëllimi i Shteteve të Bashkuara të Amerikës, sipas Departamentit të Shtetit, është që “të punojnë me Qeverinë e Kosovës për të krijuar kushtet në të cilat ura mund të hapet për qarkullimin e automjeteve”.

Për këtë qëllim, Shtetet e Bashkuara i bëjnë thirrje Qeverisë së Kosovës “të kthehet në angazhimin e ngushtë dhe konstruktiv me Shtetet e Bashkuara dhe partnerët e tjerë ndërkombëtarë”.

MARKETING