Presidenti ukrainas Zelenskyy të premten për vizitë në Türkiye

Presidenti ukrainas Volodymyr Zelenskyy do të zhvillojë një vizitë zyrtare në Türkiye të premten për të takuar presidentin Recep Tayyip Erdoğan, transmeton Anadolu.

Sipas një deklarate nga Drejtoria e Komunikimeve e Türkiyes, takimi pritet të zhvillohet në Istanbul.

“Vizita do të përfshijë një diskutim të detajuar të rrjedhës së luftës Ukrainë-Rusi, situatën e fundit të kontakteve në lidhje me vazhdimin e Marrëveshjes së Korridorit të Drithit dhe përpjekjet për paqe të qëndrueshme në rajon”, thuhet në deklaratë.

Në bisedime do të trajtohen edhe marrëdhëniet dypalëshe.

Türkiye, e vlerësuar ndërkombëtarisht për rolin e saj unik ndërmjetësues midis Ukrainës dhe Rusisë, i ka bërë vazhdimisht thirrje Kievit dhe Moskës që t’u japin fund luftimeve, të cilat filluan në shkurt 2022, nëpërmjet negociatave.

Përpjekjet turke për paqe kanë qenë të frytshme, si marrëveshja historike e drithit në korrik 2022 dhe shkëmbimi i robërve të luftës midis Rusisë dhe Ukrainës. Moska nuk e zgjati marrëveshjen pas korrikut 2023, duke përmendur si arsye kufizimet në eksportet ruse të drithit.

MARKETING