Kurti falënderon Walker-in për jehonën që i dha masakrës në Reçak
![Kurti falënderon Walker-in për jehonën që i dha masakrës në Reçak](https://shenja.tv/wp-content/uploads/2024/01/walker.jpg)
Në prag të 25-vjetorit të Masakrës në Reçak, kryeministri Albin Kurti priti në një takim miqësor ambasadorin William Walker, të cilin e falënderoi për kontributin e pazëvendësueshëm gjatë kohës së luftës dhe jehonën që i dha masakrës në Reçak në rrafshin ndërkombëtar.
Në takim u rikujtuan vitet 1998-1999, kur ambasadori Walker ishte në Kosovë në krye të Misionit Verifikues të OSBE-së, që kishte për mision të verifikonte nëse forcat serbe po vepronin në përputhje me marrëveshjen e tetorit të Kombeve të Bashkuara, për të tërhequr forcat e armatosura dhe për të respektuar armëpushimin.
Ambasadori Walker tha se ndjehet i lumtur dhe krenar për atë që Kosova ka arritur në një periudhë të shkurtër kohore, duke u bërë një nga shtetet më demokratike në Evropë. Ai tha se sa herë që vjen në Kosovë u gëzohet ndryshimeve që i sheh teksa lëvizë nëpër rrugët e Kosovës.
Bashkë me urimet për jetë të gjatë dhe shëndet të mirë, kryeministri Kurti ritheksoi mirënjohjen ndaj ambasadorit Walker, për rolin korrekt, konkret dhe human të treguar në raport me krimet e luftës që Serbia ka kryer ndaj shqiptarëve të Kosovës.