SHBA nuk po mbështet asnjë “zhvendosje të detyruar” të palestinezëve jashtë Gazës
Shtëpia e Bardhë ka deklaruar se SHBA nuk po mbështet asnjë “zhvendosje të detyruar” të palestinezëve jashtë Rripit të Gazës, transmeton Anadolu.
“Ne po mbështesim përpjekjet për kalim të sigurt për civilët në Gaza dhe ata që dëshirojnë të largohen, duke e bërë të qartë se nuk do të mbështesim asnjë zhvendosje të detyruar të palestinezëve jashtë Gazës”, u tha gazetarëve John Kirby, zëdhënës i Këshillit të Sigurisë Kombëtare.
Ai tha se administrata e presidentit Joe Biden dëshiron të garantojë tranzitin e sigurt për individët që largohen nga Gaza, me një fokus të veçantë në garantimin e sigurisë së shtetasve amerikanë.
Kirby tha se SHBA-ja vazhdon të bëjë presion për rifillimin e shërbimeve thelbësore, duke përfshirë ujin dhe shpërndarjen e karburantit.
“Karburanti do të jetë kritik këtu, sigurisht në orët dhe ditët në vijim pasi rezervat ekzistuese po mbarojnë dhe pothuajse janë bosh”, tha ai.
Përveç rritjes së numrit të viktimave civile në Gaza, bllokada izraelite e ka ndërprerë enklavën edhe nga furnizimet me karburant, energji elektrike dhe ujë.
Më tej, Kirby tha se 66 kamionë hynë në Gaza në 24 orët e fundit me ndihma humanitare për shpëtimin e jetës, duke përfshirë ushqim, ujë dhe ilaçe.
“Është një rrjedhje në krahasim me atë që duhet të futet dhe ne do të vazhdojmë të punojmë shumë, shumë fortë. Dhjetëra kamionë të tjerë pritet të plotësohen sot”, tha Kirby.
Sot më herët, shefi i Kombeve të Bashkuara (OKB), Antonio Guterres, përsëriti kërkesën e tij për një armëpushim të menjëhershëm humanitar dhe për “qasje të papenguar humanitare për të plotësuar nevojat urgjente të krijuara nga katastrofa që po shpaloset në Gaza”.
“Niveli i ndihmës humanitare që është lejuar në Gaza deri në këtë pikë është plotësisht i pamjaftueshëm dhe jo në përpjesëtim me nevojat e njerëzve në Gaza, duke e komplikuar tragjedinë humanitare”, paralajmëroi Guterres.
Ushtria izraelite ka zgjeruar sulmet e saj ajrore dhe tokësore në Rripin e Gazës, e cila ka qenë nën sulme të pamëshirshme ajrore që nga ofensiva e befasishme e grupit të rezistencës palestineze Hamas më 7 tetor.
Më shumë se 10 mijë njerëz janë vrarë në konflikt që atëherë, duke përfshirë të paktën 8.525 palestinezë dhe mbi 1.538 izraelitë.
MARKETING
