Trump kritikon kryeministrin izraelit dhe inteligjencën: Netanyahu na zhgënjeu

Ish-presidenti amerikan, Donald Trump, ka kritikuar kryeministrin izraelit, Benjamin Netanyahu dhe inteligjencën izraelite në një fjalim në Florida, transmeton Anadolu.

“Nëse flisni për inteligjencën ose flisni për disa nga gjërat që shkuan keq gjatë javës së fundit, ata duhet të përmirësojnë këtë sepse po luftojnë një forcë potencialisht shumë të madhe. Ata po luftojnë potencialisht, Iranin”, tha Trump, duke iu referuar zhvillimeve të fundit në Lindjen e Mesme.

Duke akuzuar liderin izraelit se nuk ndihmoi SHBA-në për të vrarë komandantin e lartë iranian Qassem Soleimani në vitin 2020, Trump tha: “Pra, ne ishim të zhgënjyer nga kjo, shumë të zhgënjyer, por ne e bëmë punën vetë dhe ishte me saktësi absolute, punë madhështore, e bukur dhe më pas Bibi u përpoq të merrte meritat për vete. Kjo nuk më bëri të ndihem shumë mirë. Por kjo është në rregull”.

“Nuk do ta harroj kurrë që Bibi Netanyahu na zhgënjeu”, tha ish-presidenti amerikan.

Në një përshkallëzim dramatik të tensioneve në Lindjen e Mesme, forcat izraelite kanë nisur një fushatë të ashpër dhe të fuqishme ushtarake kundër Rripit të Gazës, si përgjigje ndaj ofensivës ushtarake të grupit palestinez Hamas në territoret izraelite. Grupi tha se operacioni ishte në përgjigje të sulmeve izraelite në kompleksin e Xhamisë Al-Aksa në Kudsin Lindor të pushtuar dhe dhunës së shtuar mes kolonëve.

Në përgjigje të veprimeve të Hamasit, ushtria izraelite nisi operacionin “Shpata e Hekurt” kundër objektivave të Hamasit brenda Rripit të Gazës. Përgjigja e Izraelit është shtrirë në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në një zonë që është përfshirë nga një rrethim total që nga viti 2007.

MARKETING